ಸಿಕ್ಕಿಂ: ನಿರ್ಮಾಣ ಹಂತದ ಸುರಂಗದಲ್ಲಿ ಕುಸಿತ : ೮ ಕಾರ್ಮಿಕರ ಸಾವು

​ಗ್ಯಾಂಗಟಾಕ್ (ಸಿಕ್ಕಿಂ) – ರಾಜ್ಯದ ನಾಮ್ಚಿಯಲ್ಲಿ ನಿರ್ಮಾಣ ಹಂತದ (ಕಾಮಗಾರಿ ನಡೆಯುತ್ತಿರುವ) ಸುರಂಗದಲ್ಲಿ ಗುಡ್ಡ ಕುಸಿದು ಸಂಭವಿಸಿದ ಭೀಕರ ಅಪಘಾತದಲ್ಲಿ ೮ ಕಾರ್ಮಿಕರು ಮೃತಪಟ್ಟಿದ್ದಾರೆ, ಹಾಗೂ ೨೭ ಕಾರ್ಮಿಕರು ಇನ್ನೂ ಅವಶೇಷಗಳಡಿಯಲ್ಲಿ ಸಿಲುಕಿದ್ದಾರೆ. ಜುಲೈ ೨೦ ರಂದು ಈ ಅಪಘಾತ ಸಂಭವಿಸಿತು. ಈ ಸುರಂಗವನ್ನು ‘ನ್ಯಾಷನಲ್ ಹೈಡ್ರೋಎಲೆಕ್ಟ್ರಿಕ್ ಪವರ್ ಕಾರ್ಪೊರೇಷನ್’ನ ‘ತೀಸ್ತಾ ಸ್ಟೇಜ್-೬’ ಜಲವಿದ್ಯುತ್ ಯೋಜನೆಯ ಭಾಗವಾಗಿ ನಿರ್ಮಿಸಲಾಗುತ್ತಿತ್ತು. ಜುಲೈ ೨೦ ರಂದು ಗುಡ್ಡ ಕುಸಿದಿದ್ದರಿಂದ ಈ ಸುರಂಗದ ಪ್ರವೇಶ ದ್ವಾರ ಮುಚ್ಚಿಹೋಯಿತು.

​೧. ಅಪಘಾತದ ನಂತರ ಸುರಂಗದಲ್ಲಿ ಮಿಥೇನ್ ಅನಿಲ ಸೋರಿಕೆಯಾಗಿ ಒಂದೂವರೆ ಕಿಲೋಮೀಟರ್ ವರೆಗೆ ಹರಡಿತು. ಆಮ್ಲಜನಕದ ಕೊರತೆಯಿಂದಾಗಿ ಮತ್ತು ಶ್ವಾಸವಾಡದೆ ೮ ಕಾರ್ಮಿಕರು ಮೃತಪಟ್ಟಿದ್ದಾರೆಂದು ಸರಕಾರ ತಿಳಿಸಿದೆ.

​೨. ಸಿಲುಕಿಕೊಂಡವರಲ್ಲಿ ‘ಪಟೇಲ್ ಇಂಜನಿಯರಿಂಗ್’ ಸಂಸ್ಥೆಯ ೨೧ ಮತ್ತು ‘ನ್ಯಾಷನಲ್ ಹೈಡ್ರೋಎಲೆಕ್ಟ್ರಿಕ್ ಪವರ್ ಕಾರ್ಪೊರೇಷನ್’ನ ೬ ನೌಕರರು ಸೇರಿದ್ದಾರೆಂದು ಹೇಳಲಾಗಿದೆ.

​೩. ಘಟನಾ ಸ್ಥಳದಲ್ಲಿ ರಾಷ್ಟ್ರೀಯ ವಿಪತ್ತು ಸ್ಪಂದನಾ ಪಡೆ, ರಾಜ್ಯ ವಿಪತ್ತು ಸ್ಪಂದನಾ ಪಡೆ, ಪೊಲೀಸ್ ಮತ್ತು ಅಗ್ನಿಶಾಮಕ ದಳದಿಂದ ಯುದ್ಧೋಪಾದಿಯಲ್ಲಿ ರಕ್ಷಣಾ ಕಾರ್ಯ ನಡೆಯುತ್ತಿದೆ.

​೪. ಮಿಥೇನ್ ಅನಿಲ, ಕತ್ತಲು ಮತ್ತು ಆಮ್ಲಜನಕದ ಕೊರತೆಯಿಂದಾಗಿ ರಕ್ಷಣಾ ಕಾರ್ಯಾಚರಣೆಯಲ್ಲಿ ಹೆಚ್ಚು ಅಡೆತಡೆಗಳು ಉಂಟಾಗುತ್ತಿದ್ದು, ವಿಶೇಷ ‘ಆಂಟಿ-ಗ್ಯಾಸ್ ಗೇರ್’ ಹೊಂದಿರುವ ಹೆಚ್ಚುವರಿ ರಕ್ಷಣಾ ತಂಡಗಳನ್ನು ಕೂಡ ಕರೆಯಿಸಲಾಗಿದೆ. ಮೃತರ ಗುರುತನ್ನು ಇನ್ನೂ ಬಹಿರಂಗಪಡಿಸಲಾಗಿಲ್ಲ.