ಕೇರಳದಲ್ಲಿ ‘ಶಿಗೆಲ್ಲಾ’ ಸೋಂಕಿನಿಂದ ಒಂದು ಮಗುವಿನ ಸಾವು, 126 ಜನರಿಗೆ ಸೋಂಕು !

ತಿರುವನಂತಪುರಂ (ಕೇರಳಮ್) – ಕಳೆದ ಕೆಲವು ವರ್ಷಗಳಲ್ಲಿ ದೇಶದಲ್ಲಿ ಸಾಂಕ್ರಾಮಿಕ ರೋಗಗಳಿಂದ ಅತಿ ಹೆಚ್ಚು ಪೀಡಿತವಾದ ರಾಜ್ಯವಾಗಿ ಕೇರಳವನ್ನು ನೋಡಲಾಗುತ್ತಿದೆ. ಈಗ ರಾಜ್ಯದಲ್ಲಿ ಮತ್ತೊಂದು ಹೊಸ ಸಮಸ್ಯೆ ಉದ್ಭವಿಸಿದೆ. ಸ್ಥಳೀಯ ಮಾಧ್ಯಮಗಳ ವರದಿಗಳ ಪ್ರಕಾರ ರಾಜ್ಯದಲ್ಲಿ ‘ಶಿಗೆಲ್ಲಾ’ ಎಂಬ ಸೋಂಕಿನ ಅಪಾಯ ಕಂಡುಬಂದಿದ್ದು, ಇದರ ಸೋಂಕಿಗೆ ತುತ್ತಾದ 4 ವರ್ಷದ ಮಗುವೊಂದು ಸಾವನ್ನಪ್ಪಿದೆ. ಈ ಸೋಂಕಿಗೆ ತುತ್ತಾಗಿದ್ದ 3 ಮಕ್ಕಳನ್ನು ‘ಕೋಝಿಕ್ಕೋಡ್ ಮೆಡಿಕಲ್ ಕಾಲೇಜು’ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅವರಲ್ಲಿ ಒಬ್ಬನ ಆರೋಗ್ಯ ಹದಗೆಟ್ಟಿದ್ದರಿಂದ ಆತ ಸಾವನ್ನಪ್ಪಿದ್ದಾನೆ. ಈ ವರ್ಷದ ಆರಂಭದಲ್ಲಿಯೇ ರಾಜ್ಯದಲ್ಲಿ ‘ಶಿಗೆಲ್ಲಾ’ದ ಅನೇಕ ಪ್ರಕರಣಗಳು ಪತ್ತೆಯಾಗಿದ್ದವು. ಇದರಿಂದ ಸಾರ್ವಜನಿಕ ಆರೋಗ್ಯದ ಬಗ್ಗೆ ಆತಂಕ ನಿರ್ಮಾಣವಾಗಿದೆ.

ಶಿಗೆಲ್ಲಾ ಸೋಂಕು ಎಂದರೇನು ?

ವೈದ್ಯಕೀಯ ವರದಿಗಳ ಪ್ರಕಾರ ‘ಶಿಗೆಲ್ಲಾ’ ಅತ್ಯಂತ ಸಾಂಕ್ರಾಮಿಕ ಹಾಗೂ ಬ್ಯಾಕ್ಟೀರಿಯಾದಿಂದ (ಜೀವಾಣುಗಳಿಂದ) ಬರುವ ಕಾಯಿಲೆಯಾಗಿದೆ. ಇದು ಕರುಳಿನ ಮೇಲೆ ಪರಿಣಾಮ ಬೀರುತ್ತದೆ. ಈ ಸೋಂಕನ್ನು ಸಕಾಲದಲ್ಲಿ ಪತ್ತೆ ಮಾಡದಿದ್ದರೆ, ಗಂಭೀರ ಪ್ರಕರಣಗಳಲ್ಲಿ ರೋಗಿಯನ್ನು ಆಸ್ಪತ್ರೆಗೆ ದಾಖಲಿಸಬೇಕಾಗುತ್ತದೆ. ಸಣ್ಣ ಮಕ್ಕಳು, ವೃದ್ಧರು ಮತ್ತು ರೋಗನಿರೋಧಕ ಶಕ್ತಿ ದುರ್ಬಲವಾಗಿರುವ ವ್ಯಕ್ತಿಗಳಿಗೆ ಇದರ ಅಪಾಯ ಹೆಚ್ಚು.

ಶಿಗೆಲ್ಲಾ ಸೋಂಕು ಯಾವುದರಿಂದ ಬರುತ್ತದೆ ? ಅದರ ಲಕ್ಷಣಗಳೇನು ?

ಅಸ್ವಚ್ಛ ಪರಿಸರ, ಕಲುಷಿತ ನೀರು ಅಥವಾ ಬಾಧಿತ ವ್ಯಕ್ತಿಯ ಸಂಪರ್ಕಕ್ಕೆ ಬರುವುದರಿಂದ ಈ ಸೋಂಕು ಹರಡಬಹುದು. ಸರಿಯಾದ ನೈರ್ಮಲ್ಯ ಮತ್ತು ಒಳಚರಂಡಿ ನಿರ್ವಹಣೆಯ ಕೊರತೆಯಿರುವ ಪ್ರದೇಶಗಳಲ್ಲಿ ಈ ರೋಗವು ಆಗಾಗ್ಗೆ ಕಾಣಿಸಿಕೊಳ್ಳುತ್ತದೆ. ಈ ರೋಗವು ದೊಡ್ಡ ಕರುಳಿನ ಮೇಲೆ ಪರಿಣಾಮ ಬೀರುತ್ತದೆ. ಇದರಿಂದ ತೀವ್ರವಾದ ಅತಿಸಾರ (ಭೇದಿ), ಹೊಟ್ಟೆ ನೋವು ಮತ್ತು ಜ್ವರದಂತಹ ಸಮಸ್ಯೆಗಳು ಉದ್ಭವಿಸಬಹುದು. ವಿಶ್ವಾದ್ಯಂತ ಅತಿಸಾರಕ್ಕೆ ಸಂಬಂಧಿಸಿದ ಪ್ರಮುಖ ಸಾಂಕ್ರಾಮಿಕ ರೋಗಗಳಲ್ಲಿ ಇದು ಒಂದಾಗಿದೆ.