ಸಿದ್ಧಿವಿನಾಯಕ ದೇವಸ್ಥಾನದಲ್ಲಿ ಹಗರಣ; ಕಾನೂನು ಮತ್ತು ನ್ಯಾಯ ಇಲಾಖೆಯಿಂದ ನೋಟಿಸ್!

ಮುಂಬಯಿ – ಪ್ರಸಿದ್ಧ ಸಿದ್ಧಿವಿನಾಯಕ ದೇವಸ್ಥಾನದ ಇಬ್ಬರು ವಿಶ್ವಸ್ತರು ಮತ್ತು ಮೂವರು ದೂರುದಾರರು, ಕಾರ್ಯಕಾರಿ ಅಧಿಕಾರಿ ವೀಣಾ ಪಾಟೀಲ್ ಮತ್ತು ಉಪಕಾರ್ಯಕಾರಿ ಅಧಿಕಾರಿ ಸಂದೀಪ ರಾಠೋಡ ಅವರ ವಿರುದ್ಧ ಭ್ರಷ್ಟಾಚಾರ ಮತ್ತು ಅಕ್ರಮಗಳ ಗಂಭೀರ ಆರೋಪ ಮಾಡಿದ್ದಾರೆ. ಈ ಕುರಿತು ಕಾನೂನು ಮತ್ತು ನ್ಯಾಯ ಇಲಾಖೆಗೆ ದೂರು ನೀಡಲಾಗಿದೆ. ಆಡಳಿತಾತ್ಮಕ ಕೆಲಸಗಳಲ್ಲಿ ಪಾರದರ್ಶಕತೆ ಇಲ್ಲದಿರುವುದು, ಅಧಿಕಾರದ ದುರ್ಬಳಕೆ ಮತ್ತು ಆರ್ಥಿಕ ವ್ಯವಹಾರಗಳಲ್ಲಿ ಅಕ್ರಮಗಳು ನಡೆದಿವೆ ಎಂಬ ಆರೋಪವನ್ನು ಈ ಅಧಿಕಾರಿಗಳ ಮೇಲೆ ಹೊರಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಇಲಾಖೆಯು ಕಾರ್ಯಕಾರಿ ಮತ್ತು ಉಪಕಾರ್ಯಕಾರಿ ಅಧಿಕಾರಿಗಳಿಗೆ ೭ ದಿನಗಳಲ್ಲಿ ಸ್ಪಷ್ಟನೆ ನೀಡುವಂತೆ ನೋಟಿಸ್ ಜಾರಿ ಮಾಡಿದೆ.

ಮೇಲಿನ ಅಧಿಕಾರಿಗಳಿಗೆ ಕಾನೂನು ಮತ್ತು ನ್ಯಾಯ ಇಲಾಖೆಯು ಮಂದಿರದ ಟೆಂಡರ್ ಪ್ರಕ್ರಿಯೆಗೆ ಸಂಬಂಧಿಸಿದ ಎಲ್ಲಾ ಮೂಲ ದಾಖಲೆಗಳು, ಟೆಂಡರ್ ಉಪಸಮಿತಿಯ ಸಭೆಗಳ ನಡಾವಳಿಗಳು, ವಿಶ್ವಸ್ತ ಮಂಡಳಿಯು ತೆಗೆದುಕೊಂಡ ನಿರ್ಧಾರಗಳ ದಾಖಲೆಗಳು, ಆಡಳಿತಾತ್ಮಕ ಮಟ್ಟದಲ್ಲಿ ಹೊರಡಿಸಲಾದ ಪ್ರಮುಖ ಆದೇಶಗಳು, ಆಹಾರ ಮತ್ತು ಮಹಾಪ್ರಸಾದಕ್ಕೆ ಸಂಬಂಧಿಸಿದ ಗುತ್ತಿಗೆಗಳು ಹಾಗೂ ಅವುಗಳ ಒಪ್ಪಂದ ಇತ್ಯಾದಿಗಳನ್ನು ತಕ್ಷಣವೇ ಸಲ್ಲಿಸುವಂತೆ ಆದೇಶಿಸಿದೆ. ಸ್ಪಷ್ಟನೆಯಲ್ಲಿ ತೃಪ್ತಿಕರ ಉತ್ತರ ಸಿಗದಿದ್ದರೆ, ಕಠಿಣ ಆಡಳಿತಾತ್ಮಕ ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ ಎಂದು ಹೇಳಲಾಗುತ್ತಿದೆ. ಕಾನೂನು ಮತ್ತು ನ್ಯಾಯ ಇಲಾಖೆಯು ಈ ಆರೋಪಗಳ ಪ್ರಾಥಮಿಕ ದಾಖಲೆಯನ್ನು ಮಾಡಿಕೊಂಡಿದ್ದು, ಸಮಗ್ರ ತನಿಖೆಯ ಸೂಚನೆ ನೀಡಿದೆ. ಕೆಲ ದಿನಗಳ ಹಿಂದಷ್ಟೇ ದೇವಸ್ಥಾನದಲ್ಲಿ ನಡೆದ ಕಳ್ಳತನದ ಪ್ರಕರಣದಲ್ಲಿ ೮ ಮಂದಿ ನೌಕರರನ್ನು ಬಂಧಿಸಲಾಗಿತ್ತು.