ಕೇಂದ್ರ ಸರಕಾರದಿಂದ ದೇಶಾದ್ಯಂತ ಸಿಸಿಟಿವಿ ಕ್ಯಾಮೆರಾಗಳ ತಪಾಸಣೆ!

ಗಾಜಿಯಾಬಾದ್ (ಉತ್ತರ ಪ್ರದೇಶ): ಸಿಸಿಟಿವಿ ದೃಶ್ಯಾವಳಿಗಳು ನೇರವಾಗಿ ಪಾಕಿಸ್ತಾನಕ್ಕೆ ತಲುಪುತ್ತಿರುವುದು ಬಯಲು!

ನವ ದೆಹಲಿ – ಉತ್ತರ ಪ್ರದೇಶದ ಗಾಜಿಯಾಬಾದ್ ನಲ್ಲಿ ಪಾಕಿಸ್ತಾನಕ್ಕೆ ಸಂಬಂಧಿಸಿದ ಗೂಢಚರ್ಯೆ ಜಾಲವು ಬಯಲಾದ ನಂತರ ಸಿಸಿಟಿವಿ ವ್ಯವಸ್ಥೆಯ ಸುರಕ್ಷತೆಯ ಬಗ್ಗೆ ಪ್ರಶ್ನೆಗಳು ಉದ್ಭವಿಸಿವೆ. ಈ ಗೂಢಚರ್ಯೆ ಜಾಲದ ಮೂಲಕ ಗಾಜಿಯಾಬಾದ್ ನ ಸೂಕ್ಷ್ಮ ಪ್ರದೇಶಗಳಲ್ಲಿ ಅಳವಡಿಸಲಾಗಿದ್ದ ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ನೇರವಾಗಿ ಪಾಕಿಸ್ತಾನಕ್ಕೆ ಕಳುಹಿಸಲಾಗುತ್ತಿತ್ತು. ಈ ಘಟನೆ ಬೆಳಕಿಗೆ ಬಂದ ನಂತರ ಕೇಂದ್ರ ಸರಕಾರವು ದೇಶಾದ್ಯಂತ ಸಿಸಿಟಿವಿ ನೆಟ್‌ ವರ್ಕ್ ಅನ್ನು ತಪಾಸಣೆ ಮಾಡಲು ನಿರ್ಧರಿಸಿದೆ. ಗೃಹ ಸಚಿವಾಲಯವು ಗುಪ್ತಚರ ಇಲಾಖೆ ಮತ್ತು ಇತರ ಸಂಸ್ಥೆಗಳೊಂದಿಗೆ ಸೇರಿ ದೇಶಾದ್ಯಂತ ಸಿಸಿಟಿವಿ ನೆಟ್‌ ವರ್ಕ್‌ನ ತಪಾಸಣೆ ನಡೆಸಲು ಸಿದ್ಧತೆ ನಡೆಸುತ್ತಿದೆ.

ಚೀನಾ ನಿರ್ಮಿತ ಕ್ಯಾಮೆರಾಗಳಿಂದ ಹ್ಯಾಕಿಂಗ್ ಭೀತಿ !

ಏಪ್ರಿಲ್ ೧ ರಿಂದ ಸರಕಾರಿ ಸುರಕ್ಷತಾ ತಪಾಸಣೆಯಲ್ಲಿ ಉತ್ತೀರ್ಣರಾದ ‘ಹ್ಯಾಕಿಂಗ್‌ ಪ್ರೂಫ್ ಕ್ಯಾಮೆರಾ’ಗಳನ್ನು ಮಾತ್ರ ಮಾರಾಟ ಮಾಡಲು ಅವಕಾಶ ನೀಡಲಾಗುವುದು. ಭಾರತದಲ್ಲಿ ಶೇಕಡಾ ೮೦% ರಷ್ಟು ಸಿಸಿಟಿವಿ ಕ್ಯಾಮೆರಾಗಳು ಚೀನಾ ನಿರ್ಮಿತವಾಗಿದ್ದು, ಇದರಿಂದ ದತ್ತಾಂಶ (ಡೇಟಾ) ಕಳ್ಳತನದ ಅಪಾಯ ಮುಂದುವರಿದಿದೆ. ಪ್ರಸ್ತುತ ೭ ಸಂಸ್ಥೆಗಳ ಕೇವಲ ೫೩ ಸಿಸಿಟಿವಿ ಮಾಡೆಲ್‌ಗಳನ್ನು ಮಾತ್ರ ಪ್ರಮಾಣೀಕೃತ ಮತ್ತು ಸುರಕ್ಷಿತವೆಂದು ಪರಿಗಣಿಸಲಾಗಿದೆ.