೪೮ ವರ್ಷಗಳ ನಂತರ ಭಗವಾನ್ ಶ್ರೀ ಜಗನ್ನಾಥನ ರತ್ನ ಭಂಡಾರದ ಆಭರಣಗಳ ಎಣಿಕೆ! – Lord Sri Jagannath Ratna Bhandar Counting

ಪುರಿ (ಒಡಿಶಾ) – ಪುರಿಯ ಜಗತ್ಪ್ರಸಿದ್ಧ ಶ್ರೀ ಜಗನ್ನಾಥ ಮಂದಿರದಲ್ಲಿರುವ ಭಗವಾನ್ ಶ್ರೀ ಜಗನ್ನಾಥನ ರತ್ನ ಭಂಡಾರದ ಆಭರಣಗಳ ಎಣಿಕೆ ಮತ್ತು ಪಟ್ಟಿ ಮಾಡುವ ಪ್ರಕ್ರಿಯೆಯು ಮಾರ್ಚ್ ೨೫ ರಿಂದ ಆರಂಭವಾಗಲಿದೆ. ಈ ಎಣಿಕೆಗಾಗಿ ಒಡಿಶಾ ಸರಕಾರವು ಚೈತ್ರ ಶುಕ್ಲ ಸಪ್ತಮಿ, ಅಂದರೆ ಮಾರ್ಚ್ ೨೫ ರಂದು ಮಧ್ಯಾಹ್ನ ೧೨:೧೨ ರಿಂದ ೧:೪೫ ರವರೆಗಿನ ಶುಭ ಮುಹೂರ್ತವನ್ನು ನಿಗದಿಪಡಿಸಿದೆ. ಈ ಸಮಯದಲ್ಲಿ ಎಣಿಕೆ ಕಾರ್ಯ ಆರಂಭವಾಗಿ ದೀರ್ಘಕಾಲದವರೆಗೆ ನಡೆಯಲಿದೆ.

ಇದಕ್ಕೂ ಮೊದಲು ೧೯೭೮ ರಲ್ಲಿ ರತ್ನ ಭಂಡಾರದ ಆಭರಣಗಳ ಎಣಿಕೆ ನಡೆದಿತ್ತು, ಅದು ಸುಮಾರು ೭೨ ದಿನಗಳ ಕಾಲ ಚಾಲನೆಯಲ್ಲಿತ್ತು. ಈ ಸಂಪೂರ್ಣ ಎಣಿಕೆ ಪ್ರಕ್ರಿಯೆಯನ್ನು ಛಾಯಾಚಿತ್ರ ಮತ್ತು ವಿಡಿಯೋ ಚಿತ್ರೀಕರಣ ಮಾಡಲಾಗುವುದು. ಈ ಸಂದರ್ಭದಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ನ (RBI) ಇಬ್ಬರು ಹಿರಿಯ ಅಧಿಕಾರಿಗಳು ಹಾಗೂ ರಾಷ್ಟ್ರೀಕೃತ ಬ್ಯಾಂಕ್ನ ನೋಂದಾಯಿತ ಚಿನ್ನದ ವರ್ತಕರು (ಸರಾಫರು) ಉಪಸ್ಥಿತರಿರುವರು.

ಮುಖ್ಯ ಆಡಳಿತಾಧಿಕಾರಿ ಅರವಿಂದ ಪಾದಿ ಮಾತನಾಡಿ, “ಈ ಎಣಿಕೆ ಎಷ್ಟು ದಿನ ನಡೆಯಲಿದೆ ಎಂದು ಈಗಲೇ ಹೇಳುವುದು ಕಷ್ಟ. ಯಾವ ಯಾವ ದಿನಗಳಲ್ಲಿ ಆಭರಣಗಳ ಎಣಿಕೆ ನಡೆಯಲಿದೆ ಎಂಬುದರ ಬಗ್ಗೆ ಪ್ರತ್ಯೇಕ ವೇಳಾಪಟ್ಟಿಯನ್ನು ಪ್ರಕಟಿಸಲಾಗುವುದು,” ಎಂದಿದ್ದಾರೆ. ರಾಜ್ಯ ಸರಕಾರವು ಇಬ್ಬರು ರತ್ನ ವಿಜ್ಞಾನಿಗಳನ್ನು ಸಹ ಒದಗಿಸಲಿದ್ದು, ಅವರು ಅಮೂಲ್ಯ ರತ್ನಗಳನ್ನು ಗುರುತಿಸಲಿದ್ದಾರೆ. ಹೊರಗಿನ ರತ್ನ ಭಂಡಾರದಲ್ಲಿ ಭಗವಾನ್ ಶ್ರೀ ಜಗನ್ನಾಥನ ದೈನಂದಿನ ಬಳಕೆಯ ಆಭರಣಗಳನ್ನು ಇಡಲಾಗಿದ್ದು, ಅವುಗಳನ್ನು ಮೊದಲು ಎಣಿಕೆ ಮಾಡಲಾಗುವುದು. ನಂತರ ಒಳಗಿನ ರತ್ನ ಭಂಡಾರವನ್ನು ತೆರೆಯಲಾಗುವುದು.

“ಎಣಿಕೆಯ ಅವಧಿಯಲ್ಲಿ, ಜಿಲ್ಲಾದಂಡಾಧಿಕಾರಿಗಳು ಪ್ರತಿದಿನ ರತ್ನ ಭಂಡಾರದ ಕೀಲಿಯನ್ನು ತಂದು, ಎಣಿಕೆಯ ನಂತರ ಅದೇ ದಿನ ಅದನ್ನು ಪುನಃ ಜಮೆ ಮಾಡುವರು.”

ಆಭರಣಗಳ ಎಣಿಕೆಗಾಗಿ ರಾಜ್ಯ ಸರಕಾರವು ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದೆ. ೩ ಸದಸ್ಯರ ಸಮಿತಿಯು ಈ ಸಂಪೂರ್ಣ ಪ್ರಕ್ರಿಯೆಯ ಮೇಲ್ವಿಚಾರಣೆ ನಡೆಸಲಿದೆ. ಚಿನ್ನ, ಬೆಳ್ಳಿ ಮತ್ತು ಇತರ ಅಮೂಲ್ಯ ಆಭರಣಗಳಿಗಾಗಿ ಪ್ರತ್ಯೇಕ ಪೆಟ್ಟಿಗೆಗಳಿರಲಿವೆ. ೧೦ ಜನರು ಆಭರಣಗಳನ್ನು ಪೆಟ್ಟಿಗೆಗಳಲ್ಲಿ ಸುರಕ್ಷಿತವಾಗಿ ಇಡಲಿದ್ದಾರೆ. ದಂಡಾಧಿಕಾರಿಗಳು (Magistrates) ಪ್ರತಿದಿನ ರತ್ನ ಭಂಡಾರದ ಕೀಲಿಯನ್ನು ತರುತ್ತಾರೆ ಮತ್ತು ಆ ದಿನದ ಎಣಿಕೆ ಮುಗಿದ ನಂತರ ಮತ್ತೆ ಕೀಲಿಯನ್ನು ಜಮಾ ಮಾಡುತ್ತಾರೆ. ಶನಿವಾರ, ಭಾನುವಾರ ಮತ್ತು ಹಬ್ಬದ ದಿನಗಳಲ್ಲಿ ಭಕ್ತರ ದಟ್ಟಣೆ ಇರುವುದರಿಂದ ಎಣಿಕೆ ಕಾರ್ಯ ನಡೆಯುವುದಿಲ್ಲ. ಒಡಿಶಾ ಉಚ್ಚ ನ್ಯಾಯಾಲಯವು ಈ ಎಣಿಕೆಯನ್ನು ೩ ತಿಂಗಳೊಳಗೆ ಪೂರ್ಣಗೊಳಿಸುವಂತೆ ನಿರ್ದೇಶನ ನೀಡಿದೆ; ಆದರೆ ಈ ಸಮಯ ಮಿತಿಯನ್ನು ವಿಸ್ತರಿಸುವಂತೆ ವಿನಂತಿಸುವ ಸಾಧ್ಯತೆಯಿದೆ.

೪೮ ವರ್ಷಗಳ ಹಿಂದೆ ಇತ್ತು ೧೨೮ ಕೆಜಿ ಚಿನ್ನ ಮತ್ತು ೨೨೧ ಕೆಜಿ ಬೆಳ್ಳಿ!

‘ರತ್ನ ಭಂಡಾರ’ವು ಭಗವಾನ್ ಜಗನ್ನಾಥ, ಬಲರಾಮ ಮತ್ತು ದೇವತೆ ಸುಭದ್ರೆಯರ ಅಮೂಲ್ಯ ಆಭರಣಗಳ ಪ್ರಾಚೀನ ಖಜಾನೆಯಾಗಿದೆ. ಈ ಮಂದಿರವು ಜಗಮೋಹನ (ಸಭಾಂಗಣ) ದ ಉತ್ತರ ದಿಕ್ಕಿನಲ್ಲಿದೆ. ೧೯೭೮ ರಲ್ಲಿ ನಡೆದ ಎಣಿಕೆಯ ಪ್ರಕಾರ, ಇಲ್ಲಿ ೧೨೮.೩೮ ಕಿಲೋಗ್ರಾಂ ಚಿನ್ನ ಮತ್ತು ೨೨೧.೫೩ ಕಿಲೋಗ್ರಾಂ ಬೆಳ್ಳಿಯ ಆಭರಣಗಳಿವೆ. ಇದರಲ್ಲಿ ವಜ್ರಗಳು ಮತ್ತು ಇತರ ಬೆಲೆಬಾಳುವ ಹರಳುಗಳು ಸೇರಿವೆ. ಜುಲೈ ೧೪, ೨೦೨೪ ರಂದು ೪೬ ವರ್ಷಗಳ ನಂತರ ರತ್ನ ಭಂಡಾರವನ್ನು ದುರಸ್ತಿಗಾಗಿ ತೆರೆಯಲಾಗಿತ್ತು. ಈಗ ಅಮೂಲ್ಯ ಆಭರಣಗಳನ್ನು ಮತ್ತೆ ಮೂಲ ಭಂಡಾರಕ್ಕೆ ಸ್ಥಳಾಂತರಿಸಲಾಗುವುದು.