ಮದ್ಯದ ನಿಯಮಗಳನ್ನು ಇನ್ನಷ್ಟು ಸಡಿಲಗೊಳಿಸಿದ ಇಸ್ಲಾಮಿ ದೇಶ ಸೌದಿ ಅರೇಬಿಯಾ !

ಮಾಸಿಕ ವೇತನ ₹ 20 ಲಕ್ಷಕ್ಕಿಂತ ಹೆಚ್ಚಿರುವ ಪ್ರಯಾಣಿಕರು ಮದ್ಯ ಖರೀದಿಸಬಹುದು

ರಿಯಾಧ್ (ಸೌದಿ ಅರೇಬಿಯಾ) – ‘ಎಂ.ಬಿ.ಎಸ್’ ಎಂದೇ ಖ್ಯಾತರಾಗಿರುವ ರಾಜಕುಮಾರ ಮೊಹಮ್ಮದ್ ಬಿನ್ ಸಲ್ಮಾನ್ ಅವರ ಆಳ್ವಿಕೆಯಲ್ಲಿ ಇಸ್ಲಾಮಿ ರಾಷ್ಟ್ರ ಸೌದಿ ಅರೇಬಿಯಾ ಹೆಚ್ಚು ಪ್ರಗತಿಯತ್ತ ಸಾಗುತ್ತಿದೆ. ಸೌದಿ ಅರೇಬಿಯಾ ‘ವಿಷನ್ 2030’ ಯೋಜನೆ ಅಡಿಯಲ್ಲಿ ಪ್ರವಾಸೋದ್ಯಮವನ್ನು ದೊಡ್ಡ ಪ್ರಮಾಣದಲ್ಲಿ ಅಭಿವೃದ್ಧಿಪಡಿಸಲಾಗುತ್ತಿದೆ. ಈ ಯೋಜನೆಯ ಒಂದು ಭಾಗವಾಗಿ, ಹಿಂದೆ ಮದ್ಯದ ಮೇಲೆ ಹೇರಲಾಗಿದ್ದ ನಿಷೇಧವನ್ನು ಕ್ರಮೇಣ ತೆಗೆದುಹಾಕಲಾಗುತ್ತಿದೆ. ಕೆಲವು ತಿಂಗಳ ಹಿಂದೆ ಕೇವಲ ರಾಜತಾಂತ್ರಿಕ ಅಧಿಕಾರಿಗಳಿಗೆ ಮದ್ಯ ಸೇವಿಸಲು ಅನುಮತಿ ನೀಡಲಾಗಿತ್ತು. ಈಗ ಪ್ರತಿಷ್ಠಿತ ಮತ್ತು ಶ್ರೀಮಂತ ಪ್ರವಾಸಿ ನಾಗರಿಕರಿಗೂ ಮದ್ಯ ಒದಗಿಸಲಾಗುವುದು. ಈ ಕ್ರಮವನ್ನು ಸೌದಿ ಅರೇಬಿಯಾದ ಸಾಮಾಜಿಕ ಮತ್ತು ಆರ್ಥಿಕ ರೂಪಾಂತರದ ಸೂಚಕವೆಂದು ನೋಡಲಾಗುತ್ತಿದೆ.

ಒಟ್ಟಾರೆಯಾಗಿ, ಮೂಲಭೂತ ಇಸ್ಲಾಮಿಕ್ ಕಾನೂನುಗಳ ಕಾರಣದಿಂದಾಗಿ, ನೆರೆಯ ಯುನೈಟೆಡ್ ಅರಬ್ ಎಮಿರೇಟ್ಸ್ , ಬಹ್ರೇನ್ ಮುಂತಾದ ಮುಸ್ಲಿಂ ರಾಷ್ಟ್ರಗಳಿಗೆ ಹೋಲಿಸಿದರೆ ಸೌದಿ ಅರೇಬಿಯಾದಲ್ಲಿ ಪ್ರವಾಸೋದ್ಯಮಕ್ಕೆ ವಿಶೇಷ ಉತ್ತೇಜನ ಸಿಗುತ್ತಿರಲಿಲ್ಲ. ಆದಾಗ್ಯೂ, ಅಲ್ಲಿನ ಸರಕಾರವು 2030 ರೊಳಗೆ ಪ್ರತಿ ವರ್ಷ 15 ಕೋಟಿ ಪ್ರವಾಸಿಗರನ್ನು ಆಕರ್ಷಿಸುವ ಗುರಿಯನ್ನು ಹೊಂದಿದೆ. ಇದರಿಂದಾಗಿ, ಹೆಚ್ಚಿನ ಆದಾಯ ಗುಂಪಿನ ವೃತ್ತಿಪರರು ಮತ್ತು ವಿದೇಶಿ ಹೂಡಿಕೆದಾರರನ್ನು ಆಕರ್ಷಿಸುವ ಸಲುವಾಗಿ ಮದ್ಯದ ಮೇಲಿನ ನಿಷೇಧವನ್ನು ತೆಗೆದುಹಾಕಲಾಗಿದೆ. ಈಗ ಮಾಸಿಕ ಆದಾಯ 80,000 ರಿಯಾಲ್‌ಗಿಂತ ಹೆಚ್ಚಿರುವ (ಸುಮಾರು 20 ಲಕ್ಷ ಭಾರತೀಯ ರೂಪಾಯಿಗಳು) ಅಥವಾ ನಿರ್ದಿಷ್ಟ ವೃತ್ತಿಪರ ಕ್ಷೇತ್ರದಲ್ಲಿ ಕೆಲಸ ಮಾಡುವ ಪ್ರಯಾಣಿಕರಿಗೆ ಮದ್ಯ ಖರೀದಿಸಲು ಅನುಮತಿ ನೀಡಲಾಗಿದೆ.