ಬೋರಿವಲಿ(ಮುಂಬಯಿ): (9 ಗಜದ ಕಚ್ಚೆ ಸೀರೆ) ನೌವಾರಿ ಉಟ್ಟು ನಡೆಯುವ ಸ್ಪರ್ಧೆ; ಸಾಂಪ್ರದಾಯಿಕ ಉಡುಪಿಗೆ ಗೌರವ ನೀಡುವ ಉದ್ದೇಶ!

ಮುಂಬಯಿ – ಬೋರಿವಲಿಯಲ್ಲಿ ಮುಂಬರುವ ನವೆಂಬರ್‌ನಲ್ಲಿ ನಡೆಯಲಿರುವ ‘ಸಂಸದರ ಕ್ರೀಡಾ ಮಹೋತ್ಸವ ೨೦೨೫’ ರಲ್ಲಿ ನೌವಾರಿ ಸೀರೆ ಉಟ್ಟು ನಡೆಯುವ ಸ್ಪರ್ಧೆಯನ್ನು ಆಯೋಜಿಸಲಾಗಿದೆ. ಉತ್ತರ ಮುಂಬಯಿನ ಬಿಜೆಪಿ ಸಂಸದ ಪಿಯೂಷ್ ಗೋಯಲ್ ಅವರು ಈ ಮಹೋತ್ಸವವನ್ನು ಆಯೋಜಿಸಿದ್ದಾರೆ. ‘ಭಾರತೀಯ ಸಂಸ್ಕೃತಿ, ಸ್ವದೇಶಿ ಮತ್ತು ಸಾಂಪ್ರದಾಯಿಕ ಉಡುಪಿಗೆ ಗೌರವ ನೀಡುವುದು’, ಈ ಸ್ಪರ್ಧೆಯ ಹಿಂದಿನ ಉದ್ದೇಶವಾಗಿದೆ ಎಂದು ಅವರು ತಿಳಿಸಿದರು. ‘ಸೀರೆಯು ಸಾಂಪ್ರದಾಯಿಕ ಉಡುಪಾಗಿರುವುದರಿಂದ, ನೌವಾರಿ ಸೀರೆ ಉಟ್ಟು ನಡೆಯುವ ಸ್ಪರ್ಧೆಯಿಂದ ಹಳೆಯ ಸಂಪ್ರದಾಯಕ್ಕೆ ಪುನಶ್ಚೇತನ ಸಿಗಲಿದೆ’ ಎಂದೂ ಅವರು ಹೇಳಿದರು.

ಈ ಸ್ಪರ್ಧೆಯಲ್ಲಿ ಭಾಗವಹಿಸುವವರು ಈ ಸೀರೆ ಧರಿಸಿ ೨ ರಿಂದ ೩ ಕಿ.ಮೀ. ನಡೆಯಬೇಕಾಗುತ್ತದೆ. ಪ್ರಸ್ತುತ ಉದ್ಯೋಗಸ್ಥ ಮಹಿಳೆಯರು ಬಹಳ ವಿರಳವಾಗಿ ಸೀರೆ ಉಡುತ್ತಾರೆ. ಸೀರೆ ಉಟ್ಟು ವಾಹನದಲ್ಲಿ ಪ್ರಯಾಣಿಸುವುದು ಮತ್ತು ಇಡೀ ದಿನ ಕಛೇರಿಯಲ್ಲಿ ಓಡಾಡುವುದು ಸಾಧ್ಯವಾಗದ ಕಾರಣ ಈ ಉಡುಗೆ ಕಾಲಬಾಹಿರವಾಗುತ್ತಿದೆ. ಸರಳ ಸೀರೆ ಉಟ್ಟು ನಡೆಯುವುದು ಕೂಡಾ ಹೊಸ ಪೀಳಿಗೆಯ ಯುವತಿಯರಿಗೆ ಕೌಶಲ್ಯದ ಭಾಗವಾಗಿ ಮಾರ್ಪಟ್ಟಿದೆ. ‘ವಾಕಥಾನ್’ (ನಡಿಗೆಯ ಮೂಲಕ ಜಾಗೃತಿ) ಈ ಉಪಕ್ರಮವನ್ನು ‘ಪ್ರತಿದಿನ ನಡೆಯಿರಿ, ಆರೋಗ್ಯ ಕಾಪಾಡಿ’ ಎಂಬ ಸಂದೇಶ ನೀಡಲು ಹಮ್ಮಿಕೊಳ್ಳಲಾಗಿದೆ. ಇದರ ಮೂಲಕ ಸಾಮೂಹಿಕವಾಗಿ ನಡೆಯುವ ರೂಢಿ ಬೆಳೆಸಲು ಪ್ರಯತ್ನಿಸಲಾಗುವುದು.

ಈ ಸ್ಪರ್ಧೆಗಾಗಿ ನವೆಂಬರ್ ೨ ರವರೆಗೆ ಪೋರ್ಟಲ್‌ನಲ್ಲಿ ನೋಂದಣಿ ನಡೆಯಲಿದೆ. ಈ ಮಹೋತ್ಸವದಲ್ಲಿ (ಚೀಣಿ ಕೋಲು) ವಿಟಿ-ದಾಂಡು, (ಕುಂಟಾಟ) ಲಂಗಡಿ, ಲಗೋರಿ, ಮಲ್ಲಖಂಬ, ಕಬಡ್ಡಿ, ಖೋ-ಖೋ ಮುಂತಾದ ಭಾರತೀಯ ಆಟಗಳ ಜೊತೆಗೆ ಕ್ರಿಕೆಟ್, ಅಥ್ಲೆಟಿಕ್ಸ್, ವಾಲಿಬಾಲ್ ಆಟಗಳನ್ನು ಕೂಡಾ ‘ಖೇಲೇಗಾ ಇಂಡಿಯಾ, ತೋ ಬಢೇಗಾ ಇಂಡಿಯಾ’ ಎಂಬ ಘೋಷವಾಕ್ಯದಡಿಯಲ್ಲಿ ನಡೆಸಲಾಗುವುದು.