ಕೋತಿಯಿಂದಾಗಿ ಶ್ರೀಲಂಕಾದಲ್ಲಿ 3 ಗಂಟೆ ವಿದ್ಯುತ್ ವ್ಯತ್ಯಯ

ಕೊಲಂಬೊ (ಶ್ರೀಲಂಕಾ) – ಶ್ರೀಲಂಕಾದಲ್ಲಿ ಕೋತಿಯೊಂದು ವಿದ್ಯುತ್ ಉಪಕರಣಕ್ಕೆ ತಗುಲಿದ ಕಾರಣ ಇಡೀ ದೇಶಕ್ಕೆ ಮೂರು ಗಂಟೆಗಳ ಕಾಲ ವಿದ್ಯುತ್ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಯಿತು. ಫೆಬ್ರವರಿ 9 ರಂದು ನಡೆದ ಈ ಘಟನೆಯಿಂದಾಗಿ ದೇಶಾದ್ಯಂತ ಕತ್ತಲು ಆವರಿಸಿತ್ತು. ಶ್ರೀಲಂಕಾದ ಸೆಂಟ್ರಲ್ ಪವರ್ ಗ್ರಿಡ್‌ನಲ್ಲಿ ಉಂಟಾದ ಸಮಸ್ಯೆಯಿಂದಾಗಿ ವಿದ್ಯುತ್ ಪೂರೈಕೆ ಸ್ಥಗಿತಗೊಂಡಿತು. ಸುಮಾರು 3 ಗಂಟೆಗಳ ಕಾಲ ವಿದ್ಯುತ್ ಪೂರೈಕೆಯನ್ನು ಪುನಃಸ್ಥಾಪಿಸಲು ಸರಕಾರವು ಶ್ರಮಿಸಬೇಕಾಯಿತು.

ಈ ಘಟನೆಯ ಕುರಿತು ಮಾತನಾಡಿದ ವಿದ್ಯುತ್ ಸಚಿವ ಕುಮಾರ ಜಯಕೋಡಿ, “ಕೋತಿಯೊಂದು ಜಿಗಿಯುವಾಗ ಸೆಂಟ್ರಲ್ ಪವರ್ ಗ್ರಿಡ್‌ನ ಟ್ರಾನ್ಸ್‌ಫಾರ್ಮರ್ ಸಂಪರ್ಕಕ್ಕೆ ಬಂದ ಕಾರಣ ವಿದ್ಯುತ್ ಪೂರೈಕೆಯಲ್ಲಿ ಅಡಚಣೆ ಉಂಟಾಯಿತು. ಇದರಿಂದ ವಿದ್ಯುತ್ ಪೂರೈಕೆಯ ಕೇಂದ್ರ ವ್ಯವಸ್ಥೆಗೆ ತೊಂದರೆಯಾಗಿ ದೇಶದ ಬಹುತೇಕ ಪ್ರದೇಶಗಳಲ್ಲಿ ವಿದ್ಯುತ್ ಪೂರೈಕೆ ಸ್ಥಗಿತಗೊಂಡಿತು” ಎಂದು ತಿಳಿಸಿದರು.