ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯ (NTA) ಪ್ರಧಾನ ಕಚೇರಿಯಿಂದಲೇ ‘ನೀಟ್’ (NEET) ಪೇಪರ್ ಸೋರಿಕೆ!

ಕೇಂದ್ರ ತನಿಖಾ ದಳದ (CBI) ತನಿಖೆಯಿಂದ ಬಹಿರಂಗ!
ಹಣದ ಅತಿಯಾದ ದುರಾಸೆಯಿಂದಾಗಿ ಪ್ರಾಧ್ಯಾಪಕ ಶಿವರಾಜ್ ಮೋಟೇಗಾಂಕರ್‌ನಿಂದ ಕೃತ್ಯ!
ಪಿ.ವಿ. ಕುಲಕರ್ಣಿಯಿಂದ ೧೩೨ ಪ್ರಶ್ನೆಗಳ ಸೋರಿಕೆ!

ಮುಂಬಯಿ – ‘ನೀಟ್’ ಪೇಪರ್ ಸೋರಿಕೆಯ ಮುಖ್ಯ ಸೂತ್ರಧಾರ ಹಾಗೂ ‘ರೇಣುಕಾಯಿ ಕೆಮಿಸ್ಟ್ರಿ ಕೋಚಿಂಗ್ ಕ್ಲಾಸ್’ನ ಮಾಲೀಕ ಪ್ರಾ. ಶಿವರಾಜ್ ಮೋಟೇಗಾಂಕರ್, ಹಣದ ಅತಿಯಾದ ದುರಾಸೆಯಿಂದಾಗಿ ‘ಎನ್.ಟಿ.ಎ.’ (ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ – ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ) ಮುಖ್ಯ ಪ್ರಶ್ನೆಪತ್ರಿಕೆ ತಯಾರಿ ಸಮಿತಿಯಲ್ಲಿ ತನ್ನ ಜನರನ್ನು ಕೂರಿಸಿದ್ದನು. ಇದು ಈಗ ಕೇಂದ್ರ ತನಿಖಾ ದಳದ (CBI) ತನಿಖೆಯಿಂದ ಬಹಿರಂಗಗೊಂಡಿದೆ. ತನ್ನ ಕೋಚಿಂಗ್ ಕ್ಲಾಸ್‌ನ ಪ್ರಾ. ಪಿ.ವಿ. ಕುಲಕರ್ಣಿ ಮತ್ತು ಮಾಡರ್ನ್ ಕಾಲೇಜಿನ ‘ಬಯಾಲಜಿ’ (ಜೀವಶಾಸ್ತ್ರ) ವಿಷಯದ ಪ್ರಾಧ್ಯಾಪಕಿ ಮನಿಷಾ ಮಾಂಢರೆ ಅವರನ್ನು ಆತ ಸಂಸ್ಥೆಯ ಮುಖ್ಯ ಸಮಿತಿಗೆ ಸೇರಿಸಿದ್ದನು. ಪ್ರಾ. ಮಾಂಢರೆ ಕಳೆದ ೫ ವರ್ಷಗಳಿಂದ ‘ಎನ್.ಟಿ.ಎ.’ನಲ್ಲಿ ವಿಷಯ ತಜ್ಞೆಯಾಗಿ ಕಾರ್ಯನಿರ್ವಹಿಸುತ್ತಿದ್ದರಿಂದ, ಅವರಿಗೆ ಆ ಕಚೇರಿಯ ಸಂಪೂರ್ಣ ಮಾಹಿತಿ ಇತ್ತು.

“ಪರೀಕ್ಷಾ ಕೇಂದ್ರದಿಂದ ಮಾಹಿತಿ ಕಳುವಾದರೆ ಸಿಕ್ಕಿಬೀಳಬಹುದು” ಎಂಬ ಭಯದಿಂದ ಕುಲಕರ್ಣಿ ಮತ್ತು ಮಾಂಢರೆ ಪ್ರಶ್ನೆಗಳನ್ನು ಬಾಯಿಪಾಠ ಮಾಡಿಕೊಂಡಿದ್ದರು. ಹೊರಗೆ ಬಂದ ನಂತರ ಅವರು ಆ ಪ್ರಶ್ನೆಗಳನ್ನು ಸಣ್ಣ ಚೀಟಿಗಳು ಮತ್ತು ಕಾಗದದ ಮೇಲೆ ಬರೆದು ಮೋಟೇಗಾಂಕರ್‌ಗೆ ನೀಡಿದ್ದರು. ಮೋಟೇಗಾಂಕರ್ ಆ ಕೈಬರಹದ ಪ್ರತಿಗಳನ್ನು ಪಿ.ಡಿ.ಎಫ್. (PDF) ಮಾಡಿ ‘ಟೆಲಿಗ್ರಾಮ್’ ಮೂಲಕ ಕೋಟ್ಯಂತರ ರೂಪಾಯಿಗಳಿಗೆ ಮಾರಾಟ ಮಾಡಿದ್ದನು. ಮೇ ೩ ರಂದು ಪರೀಕ್ಷೆ ಮುಗಿಯುತ್ತಿದ್ದಂತೆ ಸಾಕ್ಷ್ಯಗಳನ್ನು ನಾಶಪಡಿಸಲು ಆತ ಮೊಬೈಲ್‌ನಲ್ಲಿದ್ದ ಮಾಹಿತಿಯನ್ನು ಡಿಲೀಟ್ ಮಾಡಿದ್ದನು; ಆದರೆ ‘ಸಿಬಿಐ’ನ ಸೈಬರ್ ತಜ್ಞರು ಆ ಮಾಹಿತಿಯನ್ನು ಮರುಪಡೆದು ಮೋಟೇಗಾಂಕರ್‌ನನ್ನು ಬಂಧಿಸಿದ್ದಾರೆ.

‘ನೀಟ್’ ಪರೀಕ್ಷೆಗಾಗಿ ಒಟ್ಟು ೪ ಸೆಟ್‌ಗಳನ್ನು ಸಿದ್ಧಪಡಿಸಲಾಗುತ್ತದೆ. ಅದರಲ್ಲಿ ೩ ಸೆಟ್‌ಗಳ ಭಾಷಾಂತರದ ಕೆಲಸ ಪ್ರಾ. ಕುಲಕರ್ಣಿ ಬಳಿ ಇತ್ತು. ಆತನ ಬಳಿ ಒಟ್ಟು ೧೩೫ ಪ್ರಶ್ನೆಗಳ ನೇರ ಮಾಹಿತಿ ಲಭ್ಯವಿತ್ತು. ಅವನು ೧೩೫ ಪ್ರಶ್ನೆಗಳ ಪೈಕಿ ೧೩೨ ಪ್ರಶ್ನೆಗಳನ್ನು ಕದ್ದು ಮೋಟೇಗಾಂಕರ್‌ಗೆ ನೀಡಿದ್ದನು. ಕುಲಕರ್ಣಿ ಈ ಪ್ರಶ್ನೆಗಳನ್ನು ಬಾಯಿಮಾತಿನಲ್ಲಿ ಹೇಳಿದ್ದನು ಮತ್ತು ಮೋಟೇಗಾಂಕರ್ ಅವುಗಳನ್ನು ಬರೆದುಕೊಂಡಿದ್ದನು.

‘ನೀಟ್’ ಪೇಪರ್ ಸೋರಿಕೆ ಪ್ರಕರಣದಲ್ಲಿ ಬಂಧಿತನಾಗಿರುವ ಶುಭಂ ಖೈರ್ನಾರ್‌ನ ವಿಚಾರಣೆಯಿಂದ ಹಲವು ಹೆಸರುಗಳು ಮುನ್ನೆಲೆಗೆ ಬಂದಿದ್ದು, ನಾಸಿಕ್‌ನ ಹಲವು ಪ್ರತಿಷ್ಠಿತ ಕೋಚಿಂಗ್ ಕ್ಲಾಸ್‌ಗಳು ಮತ್ತು ಶಿಕ್ಷಣ ಸಂಸ್ಥೆಗಳಿಗೆ ಕೇಂದ್ರ ತನಿಖಾ ದಳವು ನೋಟಿಸ್ ಜಾರಿ ಮಾಡಿದೆ.

ಮೋಟೇಗಾಂಕರ್‌ನ ಕೋಚಿಂಗ್ ಕ್ಲಾಸ್‌ನ ಅನಧಿಕೃತ ಕಟ್ಟಡ ನೆಲಸಮವಾಗಲಿದೆ!

ಹೊಸ ಉದ್ಯಮಿಗಳಿಗೆ ಪ್ರೋತ್ಸಾಹ ನೀಡಲು ಮತ್ತು ಯುವಕರಿಗೆ ಉದ್ಯೋಗಾವಕಾಶ ಕಲ್ಪಿಸಲು ಸರಕಾರವು ೨೦ ನವೆಂಬರ್ ೧೯೬೩ ರಂದು ಲಾತೂರ್ ನಗರದ ಮಧ್ಯಭಾಗದಲ್ಲಿರುವ ೨೬ ಎಕರೆ ೩೨ ಗುಂಟೆಯಷ್ಟು ಬೃಹತ್ ಜಾಗವನ್ನು ೯೯ ವರ್ಷಗಳ ಲೀಸ್ (ಗುತ್ತಿಗೆ) ಆಧಾರದ ಮೇಲೆ ‘ಇಂಡಸ್ಟ್ರಿಯಲ್ ಎಸ್ಟೇಟ್ ಕೋ-ಆಪರೇಟಿವ್ ಸೊಸೈಟಿ’ಗೆ (ಉದ್ಯೋಗ ಭವನ) ನೀಡಿತ್ತು. ಈ ಜಾಗದಲ್ಲಿ ಕೈಗಾರಿಕಾ ಕಾರ್ಖಾನೆಗಳನ್ನು ಪ್ರಾರಂಭಿಸುವುದು ಕಡ್ಡಾಯವಾಗಿದ್ದರೂ, ಕಳೆದ ಕೆಲವು ವರ್ಷಗಳಲ್ಲಿ ಇಲ್ಲಿ ಕೋಟ್ಯಂತರ ರೂಪಾಯಿಗಳ ಐಷಾರಾಮಿ ಮತ್ತು ಬಹುಮಹಡಿ ಖಾಸಗಿ ಕೋಚಿಂಗ್ ಕ್ಲಾಸ್‌ಗಳು ತಲೆಎತ್ತಿವೆ. ಇದರಲ್ಲಿ ಮೋಟೇಗಾಂಕರ್‌ನ ಕೋಚಿಂಗ್ ಕ್ಲಾಸ್ ಕಟ್ಟಡವೂ ಸೇರಿತ್ತು. ಜಿಲ್ಲಾ ಕೈಗಾರಿಕಾ ಕೇಂದ್ರವು ‘ಉದ್ಯೋಗ ಭವನ’ಕ್ಕೆ ೨೦ ಕ್ಕೂ ಹೆಚ್ಚು ನೋಟಿಸ್‌ಗಳನ್ನು ಜಾರಿ ಮಾಡಿದೆ. ಈಗ ಕೇಂದ್ರ ಸರಕಾರವು ‘ಈ ಅನಧಿಕೃತ ಕಟ್ಟಡಗಳನ್ನು ನೆಲಸಮಗೊಳಿಸಲು ಮಹಾನಗರ ಪಾಲಿಕೆಗೆ ಆದೇಶ ನೀಡಬೇಕು’ ಎಂದು ರಾಜ್ಯ ಕೈಗಾರಿಕಾ ನಿರ್ದೇಶನಾಲಯಕ್ಕೆ ನೇರ ಪತ್ರ ಕಳುಹಿಸಿದೆ.