ಪರಿಶೀಲನೆ ನಡೆಸದೆ ತಿರುಪತಿ ಮಂದಿರ ಪ್ರಸಾದದ ಲಡ್ಡುಗಾಗಿ 70 ಲಕ್ಷ ಕಿಲೋ ತುಪ್ಪದ ಬಳಕೆ!

ಭಾಗ್ಯನಗರ (ತೆಲಂಗಾಣ) – ತಿರುಮಲ ತಿರುಪತಿ ದೇವಸ್ಥಾನದ (TTD) ಲಾಡು ಪ್ರಸಾದಕ್ಕಾಗಿ ತುಪ್ಪ ಖರೀದಿ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಏಕಸದಸ್ಯ ತನಿಖಾ ಸಮಿತಿಯ ವರದಿಯ ಪ್ರಕಾರ, ಸುಮಾರು 70 ಲಕ್ಷ ಕಿಲೋ ತುಪ್ಪವನ್ನು ಯಾವುದೇ ಕಡ್ಡಾಯ ಪರಿಶೀಲನೆ ನಡೆಸದೆ ಖರೀದಿಸಲಾಗಿದೆ. ಅಷ್ಟೇ ಅಲ್ಲದೆ, ಅನೇಕ ಪ್ರಕರಣಗಳಲ್ಲಿ ಪ್ರಯೋಗಾಲಯದ ವರದಿ ಬರುವ ಮೊದಲೇ ಆ ತುಪ್ಪವನ್ನು ಪ್ರಸಾದ ತಯಾರಿಕೆಯಲ್ಲಿ ಬಳಸಲಾಗಿದೆ.

1. ಈ ಪ್ರಕರಣದಲ್ಲಿ ದೊಡ್ಡ ಮಟ್ಟದ ಆಡಳಿತಾತ್ಮಕ ಲೋಪಗಳು, ಪ್ರಕ್ರಿಯೆಗಳ ಉಲ್ಲಂಘನೆ ಮತ್ತು ಶಾಮೀಲಾಗಿರುವ ಬಗ್ಗೆ ಸಮಿತಿ ಆರೋಪ ಮಾಡಿದೆ. ಈ ಕಾರಣಗಳಿಂದಲೇ ಕಲಬೆರಕೆ ತುಪ್ಪದ ಪೂರೈಕೆ ಸಾಧ್ಯವಾಯಿತು ಎಂದು ಸಮಿತಿ ಹೇಳಿದೆ.

2. ತನಿಖಾ ವರದಿಯಲ್ಲಿ ದೇವಸ್ಥಾನದ ಮಾಜಿ ಕಾರ್ಯನಿರ್ವಹಣಾಧಿಕಾರಿ (EO) ಎ.ವಿ.ಧರ್ಮಾ ರೆಡ್ಡಿ ಅವರನ್ನು ಹೊಣೆಗಾರರನ್ನಾಗಿ ಮಾಡಲಾಗಿದೆ. ಟೆಂಡರ್ ನಿಯಮಗಳನ್ನು ಸಡಿಲಗೊಳಿಸುವುದು, ಕಲಬೆರಕೆ ಸಾಬೀತಾದ ನಂತರವೂ ಕ್ರಮ ಕೈಗೊಳ್ಳದಿರುವುದು ಮತ್ತು ಸಂಶಯಾಸ್ಪದ ಪೂರೈಕೆದಾರರಿಗೆ ಕೆಲಸ ಮುಂದುವರಿಸಲು ಅವಕಾಶ ನೀಡಿದ ಗಂಭೀರ ಆರೋಪಗಳನ್ನು ಸಮಿತಿ ಅವರ ಮೇಲೆ ಹೊರಿಸಿದೆ.

3. ಈ ಕುರಿತು ಪ್ರತಿಕ್ರಿಯಿಸಿರುವ ಧರ್ಮಾ ರೆಡ್ಡಿ ಅವರು, ಎಲ್ಲಾ ನಿರ್ಧಾರಗಳನ್ನು ಖರೀದಿ ಸಮಿತಿಯ ಎಲ್ಲಾ ಸದಸ್ಯರ ಒಪ್ಪಿಗೆಯ ಮೇರೆಗೆ ತೆಗೆದುಕೊಳ್ಳಲಾಗಿದೆ ಎಂದು ಈ ಹಿಂದೆಯೇ ತಿಳಿಸಿದ್ದಾರೆ.

ಏನಿದು ಪ್ರಕರಣ?

ಆಂಧ್ರಪ್ರದೇಶದ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರು, ರಾಜ್ಯದಲ್ಲಿ 2019 ರಿಂದ 2024 ರ ಅವಧಿಯಲ್ಲಿ ಅಂದಿನ ‘ವೈ.ಎಸ್.ಆರ್.ಸಿ.ಪಿ.’ (ಯುವಜನ ಶ್ರಮಿಕ ರೈತು ಕಾಂಗ್ರೆಸ್ ಪಕ್ಷ) ಸರಕಾರದ ಆಡಳಿತದ ಅವಧಿಯಲ್ಲಿ ಲಾಡು ಪ್ರಸಾದ ತಯಾರಿಸಲು ಕಲಬೆರಕೆ ತುಪ್ಪವನ್ನು ಬಳಸಲಾಗಿದೆ ಎಂದು ಆರೋಪಿಸಿದ್ದರು. ಆದರೆ ‘ವೈ.ಎಸ್.ಆರ್.ಸಿ.ಪಿ.’ ಈ ಆರೋಪಗಳನ್ನು ರಾಜಕೀಯ ಪ್ರೇರಿತ ಎಂದು ಹೇಳಿ ತಳ್ಳಿಹಾಕಿದೆ.