उस्मानाबादचे ‘धाराशिव’ असे नामांतर करण्यास विरोध करणारी याचिका शेख इस्माईल मसूद शेख आणि इतर १६ जण यांनी मुंबई उच्च न्यायालय येथे प्रविष्ट केली आहे. अधिवक्ता सतीश बी. तळेकर यांच्या माध्यमातून ही याचिका प्रविष्ट करण्यात आली आहे. या याचिकेवर १ ऑगस्ट या दिवशी सुनावणी होणार आहे.

जिल्हा मध्यवर्ती कारागृहात हत्येच्या प्रकरणात संशयित म्हणून अटक करण्यात आलेला आरोपी सुनील ज्ञानेश्वर राठोड हा ३१ जुलै या दिवशी सकाळी ७ वाजता वैरण अड्डा येथील भिंतीवरून उडी मारून पसार झाला आहे.

राज्यात सत्तापालट होऊन भाजपप्रणीत सरकार स्थापन होताच मुंबई जिल्हा मध्यवर्ती सहकारी बँकेचे (‘मुंबै बँके’चे) अध्यक्ष सिद्धार्थ कांबळे आणि उपाध्यक्ष विठ्ठल भोसले यांनी अचानक पदांची त्यागपत्रे दिली आहेत. या पदांसाठी ५ ऑगस्ट या दिवशी होणार्‍या संचालक मंडळाच्या बैठकीत निवड होणार आहे.

वर्ष १९७१ च्या भारत-पाकिस्तान युद्धात महत्त्वपूर्ण कामगिरी केलेला रणगाडा सांगलीत आणण्यात आला आहे. रंगरंगोटी करून तो प्रतापसिंह उद्यानात बसवला जाणार आहे. उद्यानात शिवसृष्टीही साकारली जाईल.

आम्ही अतीवृष्टीचा आढावा घेतला आहे. पावसामुळे मृत्यू झालेल्यांना साहाय्य करण्याविषयी आढावा घेतला. शेतपिकांची हानी झालेल्यांना हानीभरपाई देऊ. नवीन शिवसेना-भाजप युतीचे सरकार शेतकर्‍यांना वार्‍यावर सोडणार नाही. शेतकर्‍यांना दिलासा देणारा निर्णय घेऊ.