आमदार नीट वागले नाहीत, तर त्यांना कर्माची फळे भोगावीच लागतात ! – मंत्री सुदिन ढवळीकर

फोंडा, २४ जून (वार्ता.)  कुणाला मंत्रीमंडळात ठेवावे आणि कुणाला ठेवू नये, हा भाजपचा अंतर्गत निर्णय आहे अन् यामुळे भाजपच्या आमदारांविषयी मी काहीच बोलू शकत नाही, तरीही प्रत्येक आमदाराने सरपंच, पंच आणि लोक यांच्याशी आदराने वागले पाहिजे. जे चांगले वागत नाहीत, त्यांना कर्माची फळे भोगावीच लागतात, अशी प्रतिक्रिया वीजमंत्री सुदिन ढवळीकर यांनी २४ जून या दिवशी कवळे येथे व्यक्त केली. गोविंद गावडे यांना मंत्रीमंडळातून वगळल्यानंतर, तसेच गोविंद गावडे यांच्या खांडोळा येथील सभेनंतर प्रथमच वीजमंत्री सुदिन ढवळीकर यांनी त्यांचे मते मांडले आहे.

प्रियोळसह सर्वच मतदारसंघांमध्ये मगोचे काम चालूच रहाणार

मंत्री सुदिन ढवळीकर पुढे म्हणाले, ‘‘मगो पक्षाचे काम योग्य पद्धतीने चालू आहे. सर्वच मतदारसंघांमध्ये पक्ष वाढवण्यावर आमचा भर आहे आणि त्या दृष्टीने प्रयत्न चालू आहेत. प्रियोळसह सर्व मतदारसंघांमध्ये मगोपचे मतदार आणि समर्थक आहेत. दाबोळी मतदारसंघात मगोला यापूर्वी ५ सहस्र मते मिळाली होती.’’