जालना येथे हिंदी भाषेच्या विरोधात मनसेचे आंदोलन !

हिंदी भाषेच्या अध्यादेशाची काळी शाई टाकून होळी !

जालना – शालेय अभ्यासक्रमात हिंदी भाषा सक्तीची केल्याच्या विरोधात १९ जून या दिवशी जालना शहरातील बसस्थानकासमोर मनसेच्या वतीने आंदोलन करण्यात आले. या वेळी हिंदी भाषेच्या अध्यादेशाची काळी शाई टाकून होळी करून निषेध नोंदवला. या वेळी मनसे कार्यकर्त्यांनी राज्य सरकारच्या विरोधात घोषणा देत संपूर्ण परिसर दणाणून सोडला होता. ‘हिंदी भाषा सक्तीची करून राज्य सरकार मराठी भाषेचे महत्त्व अल्प करत आहे’, असा आरोप मनसेने केला आहे. यापुढे राज्य सरकारने महाराष्ट्रात हिंदी भाषा लादण्याचा प्रयत्न केला, तर तो हाणून पाडू, अशी चेतावणी मनसेच्या वतीने देण्यात आली आहे.

या वेळी पत्रकारांशी बोलतांना महाराष्ट्र नवनिर्माण सेनेचे जिल्हाध्यक्ष रवि राऊत म्हणाले की, महाराष्ट्र सरकार हिंदी भाषा राज्यावर लादण्याचे प्रयत्न करत असल्याने मनसे रस्त्यावर उतरली आहे. हिंदी भाषा कदापीही लादून घेणार नाही. या वेळी मनसेचे जिल्हा उपाध्यक्ष शरद मांगदरे, शहराध्यक्ष राहुल रत्नपारखे, विलास तिकांडे, गणेश देवडे, योगेश कदम, वैभव साळे आदींची उपस्थिती होती.