पैठण येथे २१ शिल्पांतून नाथांच्या जीवनकार्याची अनुभूती !

नाथ समाधी मंदिर परिसरात उभारले जात आहेत नाथांचे शिल्प !

पैठण (छत्रपती संभाजीनगर) – पैठण येथील ‘श्री संत एकनाथ महाराज समाधी मंदिर’ परिसरात नाथ संस्थानकडून होत असलेल्या सुशोभिकरणात नाथांच्या जीवनातील काही प्रसंग हे मूर्त स्वरूपात साकारण्यात आले आहेत. २१ लाख रुपयांच्या २१ शिल्पांतून नाथांच्या जीवनकार्याची अनुभूती देणारे शिल्प बनवण्यात येणार आहेत. हे शिल्प वारकरी, भाविक आणि नागरिक यांना आकर्षित करत आहेत. नाथांचे विविध प्रसंग मूर्तीमध्ये पाहून भाविक आनंदी होत आहेत. यासाठी सार्वजनिक बांधकाम विभागाचे अभियंता श्री. राजेंद्र बोरकर यांनी विशेष लक्ष दिले आहे. यापूर्वीही मंदिर परिसरात नाथांच्या जीवनावर तैलचित्र लावण्यात आले आहे.

संत एकनाथ महाराज समाधी मंदिराकडे जाणार्‍या ५०० मीटर असलेल्या दुभाजकात विविध प्रकारचे शिल्प पूर्वी बसवण्यात आले असून त्यात आता नाथांच्या जीवनचरित्रात घडलेल्या विविध प्रसंगांच्या मूर्ती बसवण्यात आल्या आहेत. त्यामुळे येणार्‍या भाविकांसाठी संत एकनाथ महाराजांचे जीवनकार्य आता शिल्पातून पहाण्याची मोठी पर्वणी आहे.