भारताला सर्जनशील महासत्ता करणार ! – देवेंद्र फडणवीस, मुख्यमंत्री

मुंबई – करमणूक क्षेत्र हे महाराष्ट्र आणि भारत यांच्यासाठी विकासाचे नवे इंजिन आहे. भारताला सर्जनशील महासत्ता करणार, असे विधान महाराष्ट्राचे मुख्यमंत्री देवेंद्र फडणवीस यांनी केले. जिओ वर्ल्ड कन्व्हेंशन सेंटर, वांद्रे-कुर्ला संकुल, मुंबई येथे १ मे या दिवशी ‘वेव्हज २०२५’चे आयोजन करण्यात आले होते. पंतप्रधान नरेंद्र मोदींच्या हस्ते या समिटचे उद्घाटन झाले. या वेळी मुख्यमंत्री देवेंद्र फडणवीस बोलत होते. या वेळी राज्यपाल सीपी राधाकृष्णन्, उपमुख्यमंत्री एकनाथ शिंदे, उपमुख्यमंत्री अजित पवार यांसह अनेक नेते आणि मान्यवर उपस्थित होते.

मुख्यमंत्री म्हणाले,,..

१. आजच्या डिजिटल युगात आशय (कंटेंट) सर्वांत वेगाने पसरतो. महाराष्ट्र या सर्जनशील क्रांतीच्या केंद्रस्थानी आहे. ही परिषद म्हणजे केवळ घटना नसून पंतप्रधान नरेंद्र मोदी यांच्या प्रेरणेतून चालू झालेली चळवळ आहे.

२. राज्य सरकार अ‍ॅनिमेशन, गेमिंग, म्युझिक आणि डिजिटल माध्यमांना चालना देण्यासाठी अनुकूल धोरणे राबवत आहे. मुंबईतील ५०० एकरच्या ‘फिल्मसिटी’ला नव्या पिढीच्या ‘स्टुडिओ इकोसिस्टम’मध्ये रूपांतर करण्याचे काम चालू आहे. यातील १२० एकरमध्ये माध्यम आणि करमणूक शहर उभारण्यात येणार असून अ‍ॅनिमेशन, VFX आणि गेमिंगसाठी हे केंद्र असेल.

‘वेव्हज २०२५’च्या निमित्ताने भारतामध्ये प्रथमच ‘इंडियन इन्स्टिट्यूट ऑफ क्रिएटिव्ह टेक्नॉलॉजी’ (IICT) मुंबईत स्थापन होणार असून त्यासाठी केंद्र सरकारने ४०० कोटी रुपयांचा निधी संमत केल्याचे केंद्रीय मंत्री अश्विनी वैष्णव यांनी दिली.

या वेळी पंतप्रधान नरेंद्र मोदी यांच्या हस्ते गुरुदत्त, पी. भानुमती, राज खोसला, ऋत्विक घटक आणि सलील चौधरी यांच्या चित्रपटामातील योगदानाचे स्मरण करत विशेष टपाल तिकिटांचे अनावरण झाले.