नालेस्वच्छतेतील भ्रष्टाचार रोखण्यासाठी मुंबई महापालिका सीसीटीव्ही कॅमेर्‍यांद्वारे लक्ष ठेवणार !

काही दिवसांपूर्वी दैनिक ‘सनातन प्रभात’ने मुंबईतील नालेस्वच्छतेच्या कामात भ्रष्टाचार होत असल्याचे वृत्त प्रसिद्ध केले होते. मालाड (पूर्व) येथील प्रतापनगरमधील एका छोट्या नाल्यातील गाळ १ ते २ दिवसांत काढून होण्यासारखा असतांना १५ दिवस गाळ काढण्याचे काम चालू होते. आधीच मातीने भरून येणार्‍या डंपरमध्ये वरवर गाळ ठेवून गाळाचे अधिक डंपर दाखवून पैसे लाटण्याचा प्रकार चालू होता. दैनिक ‘सनातन प्रभात’च्या प्रतिनिधीने प्रत्यक्ष घटनास्थळी जाऊन त्याचे चित्रीकरण करून याविषयीची माहिती मुंबई महानगरपालिकेच्या ‘एक्स’ खात्यावर पाठवली होती, तसेच मुंबई महानगरपालिकेचे आयुक्त भूषण गगराणी यांच्यापर्यंतही पोचवली होती. या वृत्तामध्ये नालेस्वच्छतेच्या कामातील भ्रष्टाचार रोखण्यासाठी महानगरपालिका प्रशासनाने ठोस कार्यवाही करण्याचे आवाहन केले होते.

संपादकीय भूमिका :

नाले स्वच्छतेसारख्या कामात भ्रष्टाचार होत असल्याचे प्रशासनाच्या लक्षात कसे आले नाही, हेही पहाणे आवश्यक !