सच्चिदानंद परब्रह्म डॉ. आठवले यांच्या खोलीत उष्णता जाणवणे, त्याचे संशोधन आणि कारणमीमांसा

सनातन संस्थेचे संस्थापक सच्चिदानंद परब्रह्म डॉ. जयंत आठवले यांच्या ८३ व्या जन्मोत्सवाच्या निमित्ताने…

१. संशोधनामागील पार्श्वभूमी

‘सच्चिदानंद परब्रह्म डॉ. आठवले (गुरुदेव) यांना त्यांच्या खोलीत डिसेंबर २०२४ पासून उष्णता जाणवत होती. खरेतर ते थंडीचे दिवस होते तरीही दिवसेंदिवस खोलीतील उष्णता वाढत होती. जानेवारी २०२५ मध्ये ही उष्णता पुष्कळ वाढली. त्यामुळे ‘महर्षि अध्यात्म विश्वविद्यालया’ने त्याविषयी संशोधन करायचे ठरवले. आम्ही (सद्गुरु डॉ. मुकुल गाडगीळ (टीप १) आणि सहकारी यांनी) खोलीतील लाद्या आणि भिंती यांच्या जवळच्या वातावरणाचे तापमान मोजायचे ठरवले. आमच्या लक्षात आले, ‘प्राणशक्ती अल्प असल्याने गुरुदेव ज्या पलंगावर आडवे पडून लिखाण करण्याची सेवा करतात, त्या पलंगाभोवतीच्या वेगवेगळ्या ठिकाणच्या लाद्यांची वेगवेगळी उष्णता आमच्या पायांच्या तळव्यांना (तळपायांना) जाणवत आहे.’ गुरुदेव संगणकाच्या समोर बसून संगणकावर ग्रंथांच्या संकलनाची सेवा करतात. तेव्हा ते ज्या ठिकाणी (ज्या लादीवर) त्यांचे चरण ठेवतात, त्या लादीची उष्णता अधिक आहे. खोलीच्या वेगवेगळ्या दिशांकडील भिंतींची उष्णता निरनिराळी आहे.’

– (सद्गुरु) डॉ. मुकुल गाडगीळ (पीएच्.डी., मुंबई विद्यापीठ), महर्षि अध्यात्म विश्वविद्यालय, गोवा.

टीप १ – ‘सद्गुरु डॉ. मुकुल गाडगीळ साधकांचा आध्यात्मिक त्रास दूर होण्यासाठी साधकांना नामजपादी उपाय सांगतात. त्यांची सूक्ष्मातील जाणण्याची क्षमता अफाट आहे. सूक्ष्मातील जाणू शकणारी व्यक्ती सूक्ष्मातील उष्णता (ऊर्जा) अनुभवू शकते. त्यामुळे गुरुदेवांच्या खोलीतील उष्णतेच्या संदर्भात सद्गुरु डॉ. गाडगीळ यांनी हे संशोधन केले आहे.’ – संकलक

२. जानेवारी २०२५ मध्ये सच्चिदानंद परब्रह्म डॉ. आठवले (गुरुदेव) यांच्या खोलीतील उष्णतेच्या संदर्भात त्यांना स्वतःला आणि साधकांना आलेल्या अनुभूती

२ अ. गुरुदेवांनी त्यांच्या खोलीत जाणवणार्‍या उष्णतेविषयी सांगितलेली सूत्रे

२ अ १. ७.१.२०२५ : या दिवशी खोलीमध्ये सर्वत्र उष्णता जाणवत होती. लादीवर पाय ठेवले की, चटके बसल्याप्रमाणे जाणवत होते. उष्णता इतकी होती की, ‘ही खोली सोडून अन्य खोलीमध्ये रहायला जावे का ?’, असे वाटत होते.

२ अ २. ८.१.२०२५ : या दिवशी पलंगावर पहुडल्यावर तळपाय भिंतीच्या दिशेने करून गादीच्या बाहेर ठेवल्यास मला भाजल्याप्रमाणे चटके जाणवत होते. पोटर्‍यांच्या तुलनेत तळपायांना अधिक गरम जाणवत होते. तळपायाचा चौडा (बोटांच्या पाठचा भाग) आणि टाच यांच्यापेक्षा त्यांच्यामधील खोलगट भाग अधिक गरम जाणवत होता आणि त्यापेक्षा तळपायाला बोटांच्या मुळाशी अधिक उष्णता जाणवत होती.

२ अ ३. ९.१.२०२५ : या दिवशी पलंगावर पहुडल्यावर तळपाय भिंतीच्या दिशेने करून गादीच्या बाहेर ठेवल्यास तळपायांना अधिक उष्णता जाणवत होती आणि पाय गुडघ्यात वाकवून गादीवर ठेवले, तर तळपायांना अल्प उष्णता जाणवत होती.’

– सच्चिदानंद परब्रह्म डॉ. आठवले

२ आ. सच्चिदानंद परब्रह्म डॉ. आठवले यांच्या खोलीतील उष्णतेच्या संदर्भात साधकांना आलेल्या अनुभूती

२ आ १. खोलीतील भिंती, लादी, पलंग, लाकडी कपाट, सोफा आणि अन्य वस्तू उष्ण जाणवणे

‘गुरुदेवांना पलंगावर पहुडल्यावर त्यांचे तळपाय गादीच्या बाहेर ठेवल्यास तळपाय भाजल्याप्रमाणे जाणवत होते. तेव्हा आम्ही साधकांनी त्यांच्या तळपायांना स्पर्श केल्यावर आम्हाला त्यांच्या पोटर्‍यांच्या तुलनेत त्यांचे तळपाय अधिक उष्ण लागत होते. यासाठी त्यांनी कालच्याप्रमाणे आजही (८.१.२०२५ या दिवशी) त्यांच्या खोलीतील लादी, भिंती आणि विविध वस्तू यांच्या तापमानाच्या संदर्भात आमच्याकडून पुढील विविध प्रयोग करून घेतले.

२ आ १ अ. भिंती

१. खोलीतील चारही भिंतींसमोर १ फूट अंतरावर आम्ही आमचा तळहात किंवा तळपाय धरल्यावर आम्हाला पुष्कळ उष्णता जाणवली.

२. खोलीतील लादीच्या तुलनेत खोलीच्या भिंती तळहाताने तुलना केल्यावर अधिक उष्ण जाणवल्या.

२ आ १ आ. खोलीची लादी

१. खोलीच्या मध्यभागातील लादी आम्हाला अल्प उष्ण जाणवली.

२. खोलीच्या पूर्व आणि पश्चिम भागातील लादी आम्हाला सर्वांत जास्त उष्ण जाणवली.

(‘याचे कारण म्हणजे गुरुदेवांना अल्प प्राणशक्तीमुळे दिवसभरातील अधिक वेळ पलंगावर पहुडावे लागते. खोलीत त्यांचा पलंग दक्षिणेकडील भिंतीजवळ ‘पूर्व-पश्चिम’ या दिशेने ठेवलेला आहे आणि गुरुदेवांचे डोके पूर्वेला असते. त्यामुळे त्यांच्याकडून ‘पूर्व-पश्चिम’ या दिशेला अधिक प्रमाणात ऊर्जा प्रक्षेपित होते.’ – संकलक)

३. लादीपासून साधारण ३ फूट उंचीपर्यंत आमच्या तळहाताला उष्णता जाणवली.

४. गुरुदेवांनी लादीपासून सुमारे ४ फूट अंतरावर त्यांचा तळहात धरला. त्यानंतर आम्ही लादी आणि त्यांचा तळहात यांच्यामधील जागेतील उष्णता पडताळत असतांना आम्हाला उष्णता जाणवली.

(‘गुरुदेवांनी लादीपासून ४ फूट उंचीवर त्यांचा तळहात धरल्यावर त्यांच्या तळहाताकडून ऊर्जा प्रक्षेपित झाल्याने लादी आणि त्यांचा तळहात यांमधील जागेत साधकांना उष्णता जाणवली.’ – संकलक)

५. गुरुदेवांनी लादीपासून सुमारे ३ फूट उंचीवर त्यांचा तळपाय धरला. त्यानंतर आम्ही लादी आणि त्यांचा तळपाय यांच्यामधील जागेतील उष्णता बघत असतांना आम्हाला अधिक उष्णता जाणवली.

(‘तळहातांपेक्षा तळपायांतून अधिक प्रमाणात उष्णता प्रक्षेपित होते.’ – संकलक)

(क्रमश:)

– श्री. भानू पुराणिक (आध्यात्मिक पातळी ६६ टक्के) आणि श्री. अमित डगवार

या लेखाचा पुढील भाग वाचण्यासाठी येथे क्लिक करा : https://sanatanprabhat.org/marathi/909323.html