पुणे येथील ‘शिवसृष्टी’च्या तिसर्‍या टप्प्यासाठी ५० कोटी रुपयांचे प्रावधान !

पुणे – भावी पिढ्यांना छत्रपती शिवरायांच्या स्फूर्तीदायी चरित्राची ओळख अद्ययावत् तंत्रज्ञानाच्या आधारे करून देण्यासाठी पुणे शहरातील आंबेगाव येथे ४ टप्प्यांत भव्य ‘शिवसृष्टी प्रकल्प’ उभारण्यात येत आहे. त्यातील २ टप्प्यांचे काम पूर्ण झाले असून, उर्वरित काम अधिक गतीने होण्यासाठी राज्यशासनाकडून ५० कोटी रुपयांचे प्रावधान अर्थसंकल्पात केले आहे. त्यामुळे ‘शिवसृष्टी’च्या पुढील २ टप्प्यांचे काम वेगाने होण्याचा मार्ग मोकळा झाला.

‘महाराजा शिवछत्रपती प्रतिष्ठान’च्या वतीने आणि पद्मविभूषण शिवशाहीर बाबासाहेब पुरंदरे यांच्या मूळ संकल्पनेतून शिवसृष्टी साकारली जात आहे. ती पुढील पिढ्यांसाठी प्रेरणेचे केंद्र ठरणार आहे. शिवसृष्टीला राज्य सरकारने महत्त्वाच्या पर्यटनस्थळाचा दर्जा दिला असला, तरी शिवसृष्टी हे पर्यटनकेंद्र नसून छत्रपती शिवरायांवरील अभ्यासाचे आणि त्यांच्या व्यक्तीमत्त्वापासून प्रेरणा घेण्याचे केंद्र बनले आहे. शिवसृष्टीच्या दुसर्‍या टप्याच्या निर्मितीमध्ये ८७ कोटी रुपये इतकी गुंतवणूक केली असून स्वदेश, स्वधर्म आणि स्वभाषा ही छत्रपती शिवाजी महाराजांना जवळच्या असणार्‍या महत्त्वाच्या ३ तत्त्वांवर या टप्प्यांच्या निर्मितीमध्ये विशेष लक्ष केंद्रित केले आहे.