जेजुरी गडावर भाविकांसाठी वस्त्रसंहिता लागू !

(वस्त्रसंहिता म्हणजे मंदिरात प्रवेश करतांना परिधान करायच्या कपड्यांच्या संदर्भातील नियमावली)

जेजुरी (पुणे) – महाराष्ट्राचे कुलदैवत असणार्‍या खंडोबा देवाच्या दर्शनासाठी जेजुरी गडावर येणार्‍या भाविकांसाठी वस्त्रसंहिता लागू करण्यात आली आहे. हा निर्णय देवस्थान ट्रस्टने घेतला आहे. ट्रस्टने त्याची नियमावलीही घोषित केली आहे. या वस्त्रसंहितेनुसार मंदिरात दर्शनासाठी येतांना भारतीय वेशभूषा परिधान करणे आवश्यक असेल. ‘भारतीय वेशभूषा असेल, तरच भाविकांना प्रवेश मिळेल, असा निर्णय श्री मार्तंड देव संस्थान, जेजुरीच्या विश्‍वस्त मंडळाच्या वतीने घेण्यात आला आहे. पाश्‍चिमात्य कपडे परिधान करून आल्यास खंडेरायाच्या दर्शनाचा लाभ घेता येणार नाही.

देवस्थान ट्रस्टने सांगितले की,…

१. पुरुष आणि महिला भाविकांना अल्प कपड्यांमध्ये प्रवेश मिळणार नाही.

२. फॅशन म्हणून वापरण्यात येणार्‍या फाटक्या जीन्स, बरमुडा, शॉर्ट, स्कर्ट किंवा तत्सम कपडे घालून देवदर्शनास गडावर येण्यास मज्जाव केला जाईल.

३. गुडघ्याच्या वर असणारे किंवा आखूड-कमी कपडे घालून येऊ नये.