देशद्रोहाचा खटला प्रविष्ट करून अबू आझमी यांची आमदारकी रहित करा ! – नितीन शिंदे, प्रदेशाध्यक्ष, हिंदु एकता आंदोलन

सांगली येथे क्रूरकर्मा औरंगजेब आणि आमदार अबू आझमी यांच्या प्रतिमेला जोडे मारा आंदोलन !

सांगली, ४ मार्च (वार्ता.) – राज्यातील अर्थसंकल्पीय अधिवेशनाच्या पहिल्या दिवशी समाजवादी पक्षाचे हिंदुद्वेषी आमदार अबू आझमी यांनी औरंगजेब हा उत्तम प्रशासक होता, त्याने भारताच्या सीमा वाढवल्या. औरंगजेब क्रूर नव्हता अशा पद्धतीने वक्तव्य करून धर्मवीर छत्रपती संभाजी महाराजांच्या बलीदानाचा अवमान केल्याच्या निषेधार्थ ४ मार्च या दिवशी हिंदु एकता आंदोलनाच्या वतीने येथील स्टेशन चौकात अबू आझमी आणि औरंगजेब यांच्या प्रतिमेला जोडे मारून प्रतिमेचे दहन करण्यात आले.

या वेळी बोलतांना हिंदु एकता आंदोलनाचे प्रदेशाध्यक्ष तथा माजी आमदार श्री. नितीन शिंदे म्हणाले की, आमदार अबू आझमी यांनी यापूर्वी विधिमंडळात ‘मी वन्दे मातरम् म्हणणार नाही, मी भारतमाता की जय म्हणणार नाही’, अशी वक्तव्य केलेली आहेत. अशा देशद्रोही वृत्तीच्या अबू आझमी यांच्यावर देशद्रोहाचा गुन्हा नोंद करून त्यांची आमदारकी राज्यातील हिंदुत्वनिष्ठ सरकारने रहित करावी, अन्यथा अबू आझमी यांना राज्यात शिवभक्त फिरू देणार नाहीत.

या वेळी हिंदु एकता आंदोलनाचे शहराध्यक्ष श्री. संजय जाधव, भाजपचे नेते श्री. अविनाश मोहिते, श्री. प्रसाद रिसवडे आदींची भाषणे झाली. या वेळी अबू आझमी यांच्या विरोधात जोरदार घोषणा देऊन औरंगजेबाच्या प्रतिमेला जोडे मारून आणि प्रतिमेचे दहन करून निदर्शने करण्यात आली. या वेळी सर्वश्री अनिरुद्ध कुंभार, मनोज साळुंखे, अवधूत जाधव, गजानन मोरे, रवींद्र वादवणे, पंडितराव बोराडे आदींसह हिंदु एकता आंदोलनाचे पदाधिकारी, कार्यकर्ते आणि शिवभक्त उपस्थित होते.