उद्योजकांना त्रास देणार्‍यांना ‘मकोका’ लावा ! – मुख्यमंत्री

पिंपरी – पुणे आणि पिंपरी-चिंचवडचा परिसर राज्याच्या उद्योगाचे महत्त्वाचे केंद्र आहे. मोठ्या प्रमाणावर उद्योग येथे येत असूनही त्रास दिला जात असल्याच्या तक्रारी उद्योगांकडून केल्या जातात. उद्योगांना त्रास देणारा कोणत्याही पक्षाचा असला, तरी त्याला सोडू नका. उद्योगांना त्रास देणार्‍या सर्वांवर ‘महाराष्ट्र संघटित गुन्हेगारी नियंत्रण कायद्या’(मकोका)च्या  माध्यमातून कारवाई करा, असा आदेश मुख्यमंत्री देवेंद्र फडणवीस यांनी ६ फेब्रुवारी या दिवशी पोलिसांना दिला. पोलीस कार्यालयाच्या उद्घाटनासाठी ते आले होते.

महाराष्ट्रामध्ये उद्योगांना कोणताही त्रास होणार नाही, याची दक्षता घ्या, अशी तंबी फडणवीस यांनी दिली. विविध ठिकाणी उद्योगांना त्रास दिला जात असल्याच्या अनेक तक्रारी येत आहेत. राज्यात उद्योजक येत असल्याने, गुंतवणूक वाढत असल्याने उद्योजकांना, उद्योगांना पोषक वातावरण असणे आवश्यक असल्याचे मुख्यमंत्र्यांनी स्पष्ट केले.