सदाशिवगड (कराड) आरोग्य केंद्राची नवी रुग्णवाहिका उद्घाटनाच्या प्रतीक्षेत !

कराड, २४ जानेवारी (वार्ता.) – हजारमाची येथील सदाशिवगड प्राथमिक आरोग्य केंद्रातील रुग्णांच्या सेवेसाठी शासनाने नवीन रुग्णवाहिका उपलब्ध करून दिली आहे; मात्र ही रुग्णवाहिका उद्घाटनाच्या प्रतीक्षेत आरोग्य केंद्राच्या आवारात उभी आहे.

सदाशिवगड प्राथमिक आरोग्य केंद्राच्या कार्यक्षेत्रामध्ये १८ गावांतील ६० सहस्र नागरिकांचा समावेश होतो. प्राथमिक आरोग्य केंद्राकडे पूर्वीची रुग्णवाहिका आहे; परंतु ती नादुरुस्त असते. स्थानिक लोकप्रतिनिधींनी सरकारकडे अत्याधुनिक आणि सुसज्ज रुग्णवाहिका देण्याची मागणी केली होती. भाजपचे विद्यमान आमदार मनोज घोरपडे यांनी याचा पाठपुरावा घेऊन ही रुग्णवाहिका उपलब्ध करून दिली; मात्र ही रुग्णवाहिका सदाशिवगड आरोग्य केंद्राच्या आवारामध्ये धूळखात उभी असून उद्घाटनाच्या प्रतीक्षेत आहे. ही रुग्णवाहिका लवकरात लवकर रुग्णांच्या सेवेसाठी उपलब्ध करून देण्यात यावी, अशी मागणी स्थानिक नागरिक करत आहेत.