नाराज रशियन सैनिकांनी स्वतःच्याच कर्नलला रणगाड्याखाली चिरडून मारले ! – पाश्चात्त्य देशांतील अधिकार्‍यांचा दावा

कीव (युक्रेन) – गेल्या मासाभरापासून रशियाच्या युक्रेनविरोधातील सैनिकी कारवाया चालू असूनही त्याला युक्रेनवर नियंत्रण मिळवता आलेले नाही. एकूण परिस्थिती पहाता रशियन सैनिकांचे मनोधैर्य खचू लागले आहे, असे म्हटले जात आहे. अशाच नाराज झालेल्या काही रशियन सैनिकांनी त्यांच्याच एका कर्नलला रणगाड्याखाली चिरडून मारून टाकल्याची बातमी समोर आली आहे. हा दावा ‘द सन’ या विदेशी प्रसारमाध्यातून पाश्चात्त्य देशांतील अधिकार्‍यांनी केला.

युरी मेद्वेदेव असे या कर्नलचे नाव असून युक्रेन युद्धात सैनिकांच्या तुकडीचे ते नेतृत्व करत होते. काही बंडखोर सैनिकांनी जाणूनबुजून ३७ व्या ‘मोटर रायफल ब्रिगेड’चे कमांडर म्हणून असलेल्या या कर्नलच्या अंगावर रणगाडा घातला. यात गंभीर दुखापत झालेले मेद्वेदेव यांचा मृत्यू झाला.