इराकमधील उत्खननात भगवान श्रीराम आणि हनुमान यांच्या ६ सहस्र वर्षांपूर्वीच्या मूर्ती सापडल्या

पूर्वी भारतातच नव्हे, तर जगभरात केवळ हिंदु धर्माचेच अस्तित्व होते आणि सर्वत्र हिंदूंच्या देवतांचे पूजन केले जात होते, हे अशा घटनांमुळे पुनःपुन्हा उघड होत आहे !

नवी देहली – इराकच्या सिलेमानिया या भागातील बैनुला बायपास जवळ करण्यात आलेल्या उत्खननात भगवान श्रीराम आणि हनुमान यांच्या ६ सहस्र वर्षांपूर्वीच्या मूर्ती सापडल्या आहेत. याला इराक सरकारनेही भारताला पत्र लिहून दुजोरा दिला आहे. इराकच्या पुरातत्व खात्यानेच या मूर्ती ६ सहस्र वर्षांपूर्वीच्या असल्याचा दावा केला आहे. यानंतर भारत सरकारने याविषयीची अधिक माहिती इराककडून मागवली आहे. उत्तरप्रदेशच्या संस्कृती विभागाने आणि विशेषतः ‘अयोध्या शोध संस्थान’ने या मूर्तींचे अधिक संशोधन करण्याची आवश्यकता असल्याचे म्हटले आहे. यानंतर इराक सरकारने संस्कृती विभाग आणि ‘अयोध्या शोध संस्थान’ यांना इराकमध्ये अधिक संशोधनासाठी आमंत्रित केले आहे. या संदर्भात त्यांनी पत्र लिहिले आहे. लवकर या संस्थांकडून इराकमध्ये पथक पाठवण्यात येणार आहे.

१. याविषयी अयोध्या संत समितीचे अध्यक्ष महंत कन्हय्या दास म्हणाले, ‘‘यात आश्‍चर्य वाटण्यासारखे काही नाही. बृहद (मोठा) भारतामध्ये जगाचा मोठा भाग येतो. इराकच नाही, तर अन्य देशांतही भगवान श्रीरामांच्या अस्तित्वाचे प्रमाण मिळेल.’’

२. जगदगुरु रामदिनेशाचार्य म्हणाले, ‘‘ही माहिती आनंद देणारी आहे आणि जे भगवान श्रीराम यांना ‘काल्पनिक’ म्हणत होते अन् त्यांच्या अस्तित्वावर प्रश्‍न निर्माण करत होते, त्यांना चपराकही आहे . आता भारत सरकारने याविषयी अधिक संशोधन केले पाहिजे.’’

३. आचार्य सतेंद्र दास म्हणाले, ‘‘पूर्वी जगाला कोणतीही सीमा नव्हती. संपूर्ण विश्‍वच भगवान श्रीराम यांना मानत होता. आता मूर्ती सापडल्याने श्रीरामांचे भक्त या पृथ्वीतलावर सर्वत्र आहेत, हे स्पष्ट होते.’’


Multi Language |Offline reading | PDF