Supreme Court On Sharia, Kazi Courts : ಷರಿಯತ್ ನ್ಯಾಯಾಲಯಗಳಿಗೆ ಕಾನೂನಿನ ಮಾನ್ಯತೆ ಇಲ್ಲ! – ಸರ್ವೋಚ್ಚ ನ್ಯಾಯಾಲಯ

ನವದೆಹಲಿ – ಖಾಜಿ (ಇಸ್ಲಾಮಿಕ್ ಕಾನೂನು ತಜ್ಞರು ಮತ್ತು ನ್ಯಾಯಾಧೀಶರು ನಡೆಸುವ) ನ್ಯಾಯಾಲಯಗಳು ಅಥವಾ ಷರಿಯತ್ ನ್ಯಾಯಾಲಯಗಳಿಗೆ ಕಾನೂನಿನ ಮಾನ್ಯತೆ ಇಲ್ಲ ಎಂಬ ಸೂತ್ರವನ್ನು ಸರ್ವೋಚ್ಚ ನ್ಯಾಯಾಲಯ ಪುನರುಚ್ಚರಿಸಿದೆ. ಇದರೊಂದಿಗೆ, “ಈ ನ್ಯಾಯಾಲಯಗಳು ನೀಡಿದ ತೀರ್ಪುಗಳು ಕಾನೂನಿನ ಪ್ರಕಾರ ಜಾರಿಗೊಳಿಸಲು ಯೋಗ್ಯವಲ್ಲ, ಹಾಗೂ ಅವುಗಳ ತೀರ್ಪುಗಳನ್ನು ಪಾಲಿಸುವುದು ಕಡ್ಡಾಯವಲ್ಲ” ಎಂದೂ ಸಹ ಸರ್ವೋಚ್ಚ ನ್ಯಾಯಾಲಯ ಹೇಳಿದೆ. ಅಲಹಾಬಾದ್ ಉಚ್ಚ ನ್ಯಾಯಾಲಯದ ತೀರ್ಪನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಮಹಿಳೆಯೊಬ್ಬರ ಅರ್ಜಿಯ ವಿಚಾರಣೆಯ ಸಂದರ್ಭದಲ್ಲಿ ಸರ್ವೋಚ್ಚ ನ್ಯಾಯಾಲಯ ಈ ತೀರ್ಪು ನೀಡಿದೆ.

ಫತ್ವಾಗಳಿಗೆ ಕಾನೂನಿನ ಮಾನ್ಯತೆ ಇಲ್ಲ!

ಸರ್ವೋಚ್ಚ ನ್ಯಾಯಾಲಯದ ನ್ಯಾಯಮೂರ್ತಿಗಳಾದ ಸುಧಾಂಶು ಧುಲಿಯಾ ಮತ್ತು ನ್ಯಾಯಮೂರ್ತಿ ಅಹ್ಸಾನುದ್ದೀನ್ ಅಮಾನುಲ್ಲಾಹ ಅವರ ಪೀಠವು ವಿಶ್ವ ಲೋಚನ್ ಮದನ ವಿರುದ್ಧ ಭಾರತ ಒಕ್ಕೂಟ ಪ್ರಕರಣದ 2014 ರ ತೀರ್ಪನ್ನು ಉಲ್ಲೇಖಿಸಿ, ಷರಿಯತ್ ನ್ಯಾಯಾಲಯಗಳು ಮತ್ತು ಫತ್ವಾಗಳಿಗೆ ಕಾನೂನಿನ ಮಾನ್ಯತೆ ಇಲ್ಲ ಎಂದು ಹೇಳಿದೆ.

ಪ್ರಕರಣದ ಹಿನ್ನೆಲೆ

ಸಂಬಂಧಪಟ್ಟ ಮುಸ್ಲಿಂ ಮಹಿಳೆಯ ವಿವಾಹವು ಸೆಪ್ಟೆಂಬರ್ 24. 2002 ರಂದು ಇಸ್ಲಾಮಿಕ್ ಸಂಪ್ರದಾಯದಂತೆ ನಡೆದಿತ್ತು. ಇಬ್ಬರಿಗೂ ಇದು ಎರಡನೇ ವಿವಾಹವಾಗಿತ್ತು. 2005 ರಲ್ಲಿ ಮಧ್ಯಪ್ರದೇಶದ ಭೋಪಾಲ್‌ನ ‘ಖಾಜಿ ಕಿ ಅದಾಲತ್’ ನಲ್ಲಿ ಮಹಿಳೆಯ ವಿರುದ್ಧ ವಿಚ್ಛೇದನಕ್ಕಾಗಿ ಪ್ರಕರಣ ದಾಖಲಿಸಲಾಗಿತ್ತು. ನವೆಂಬರ್ 22, 2005 ರಂದು ಎರಡೂ ಕಡೆಗಳ ನಡುವಿನ ಒಪ್ಪಂದದ ಆಧಾರದ ಮೇಲೆ ಅದನ್ನು ವಜಾ ಮಾಡಲಾಗಿತ್ತು. ಇದರ ನಂತರ, 2008 ರಲ್ಲಿ ಪತಿಯು ಕಾಜಿಯತ್ (ದಾರುಲ್ ಕಾಜಾ) ನ್ಯಾಯಾಲಯದಲ್ಲಿ ವಿಚ್ಛೇದನಕ್ಕಾಗಿ ಎರಡನೇ ಪ್ರಕರಣವನ್ನು ದಾಖಲಿಸಿದನು. ಅದೇ ವರ್ಷದಲ್ಲಿ, ಪತ್ನಿಯು ಜೀವನಾಂಶಕ್ಕಾಗಿ ಕೌಟುಂಬಿಕ ನ್ಯಾಯಾಲಯವನ್ನು ಸಂಪರ್ಕಿಸಿದಳು. ಕೌಟುಂಬಿಕ ನ್ಯಾಯಾಲಯವು ಮಹಿಳೆಯ ಜೀವನಾಂಶದ ಅರ್ಜಿಯನ್ನು ತಿರಸ್ಕರಿಸಿತು; ಏಕೆಂದರೆ ಪ್ರತಿವಾದಿ ಪತಿಯು ಮಹಿಳೆಯನ್ನು ತೊರೆದಿರಲಿಲ್ಲ, ಆದರೆ ಆಕೆಯ ಸ್ವಭಾವ ಮತ್ತು ನಡತೆಯಿಂದಾಗಿ ಅವಳು ಸ್ವತಃ ಕಲಹ ಮತ್ತು ವೈವಾಹಿಕ ಮನೆಯಿಂದ ಹೊರಹೋಗಲು ಮುಖ್ಯ ಕಾರಣವಾಗಿದ್ದಳು. ನಂತರ ಈ ಪ್ರಕರಣವು ಅಲಹಾಬಾದ್ ಉಚ್ಚ ನ್ಯಾಯಾಲಯವನ್ನು ತಲುಪಿತು, ಅಲ್ಲಿ ಉಚ್ಚ ನ್ಯಾಯಾಲಯವು ಕೌಟುಂಬಿಕ ನ್ಯಾಯಾಲಯದ ತೀರ್ಪನ್ನು ಎತ್ತಿಹಿಡಿಯಿತು. ನಂತರ ಮಹಿಳೆಯು ಸರ್ವೋಚ್ಚ ನ್ಯಾಯಾಲಯವನ್ನು ಸಂಪರ್ಕಿಸಿದಳು, ಈ ಕುರಿತು ಸರ್ವೋಚ್ಚ ನ್ಯಾಯಾಲಯವು ಫೆಬ್ರವರಿ 4 ರಂದು ಆದೇಶ ನೀಡಿತು. ಆದಾಗ್ಯೂ, ಈ ಆದೇಶವು ಈಗ ಬಹಿರಂಗವಾಗಿದೆ. ಎರಡೂ ಕಡೆಯವರಿಗೆ ಇದು ಎರಡನೇ ವಿವಾಹವಾಗಿದ್ದರಿಂದ ಪತಿ ವರದಕ್ಷಿಣೆ ಕೇಳುವ ಸಾಧ್ಯತೆ ಇರಲಿಲ್ಲ ಎಂಬ ಕೌಟುಂಬಿಕ ನ್ಯಾಯಾಲಯದ ವಾದವನ್ನೂ ಸಹ ಸರ್ವೋಚ್ಚ ನ್ಯಾಯಾಲಯ ಟೀಕಿಸಿದೆ.