೧೯೮೪ ರಿಂದ ೨೦೧೫ ರ ಅವಧಿಯಲ್ಲಿ ಕರ್ನಾಟಕದಲ್ಲಿ ಮುಸಲ್ಮಾನರ ಸಂಖ್ಯೆ ೯೪% ರಷ್ಟು ಹೆಚ್ಚಳ !

ಬೆಂಗಳೂರು – ಕರ್ನಾಟಕದಲ್ಲಿ ೧೯೮೪ ರಿಂದ ೨೦೧೫ ರ ಅವಧಿಯಲ್ಲಿ ಮುಸಲ್ಮಾನರ ಜನಸಂಖ್ಯೆಯು ಸುಮಾರು ದ್ವಿಗುಣಗೊಂಡಿದೆ. ಆದರೆ ಈ ಅವಧಿಯಲ್ಲಿ ಲಿಂಗಾಯತ ಹಿಂದೂಗಳ ಜನಸಂಖ್ಯೆಯು ಕೇವಲ ೧೦% ರಷ್ಟು ಮಾತ್ರ ಹೆಚ್ಚಾಗಿದೆ. ರಾಜ್ಯದಲ್ಲಿ ನಡೆದ ಜಾತಿ ಗಣತಿಯ ಸಮೀಕ್ಷೆಯಿಂದ ಈ ಅಂಕಿ-ಅಂಶಗಳು ಬಹಿರಂಗವಾಗಿವೆ.

೧. ‘ಡೆಕ್ಕನ್ ಹೆರಾಲ್ಡ್’ ದಿನಪತ್ರಿಕೆಯ ವರದಿಯ ಪ್ರಕಾರ, ೧೯೮೪ ರಲ್ಲಿ ಕರ್ನಾಟಕದ ಜಾತಿಗಳ ಜನಸಂಖ್ಯೆಯ ಅಂದಾಜು ಮಾಡಲು ರಚಿಸಲಾದ ವೆಂಕಟಸ್ವಾಮಿ ಆಯೋಗದ ಸಮೀಕ್ಷೆಯಲ್ಲಿ ಮುಸಲ್ಮಾನರ ಜನಸಂಖ್ಯೆ ೩೯ ಲಕ್ಷ ೬೩ ಸಾವಿರ ವರದಿಯಾಗಿತ್ತು, ಇದು ರಾಜ್ಯದ ಜನಸಂಖ್ಯೆಯ ೧೦.೯೭% ರಷ್ಟಿತ್ತು.

೨. ಇದೇ ಸಮೀಕ್ಷೆಯಿಂದ ತಿಳಿದುಬಂದ ಅಂಶವೆಂದರೆ, ಕರ್ನಾಟಕದಲ್ಲಿ ೬೧ ಲಕ್ಷ ೧೪ ಸಾವಿರ ವೀರಶೈವ-ಲಿಂಗಾಯತರಿದ್ದಾರೆ ಮತ್ತು ಅವರು ರಾಜ್ಯದ ಜನಸಂಖ್ಯೆಯ ೧೬.೯೨% ರಷ್ಟಿದ್ದಾರೆ. ಇದರ ಹೊರತಾಗಿ, ಒಕ್ಕಲಿಗ ಸಮುದಾಯದ ಜನಸಂಖ್ಯೆ ೪೨ ಲಕ್ಷ ೧೯ ಸಾವಿರ ಎಂದು ಹೇಳಲಾಗಿದ್ದು ಆಗ ರಾಜ್ಯದ ಜನಸಂಖ್ಯೆಯಲ್ಲಿ ಅವರ ಪಾಲು ೧೧.೬೮% ರಷ್ಟಿತ್ತು.

೩. ೧೯೮೪ ರ ಸಮೀಕ್ಷೆಯಲ್ಲಿ ರಾಜ್ಯದ ದಲಿತ ಜನಸಂಖ್ಯೆ ೫೭ ಲಕ್ಷ ೩೧ ಸಾವಿರವಾಗಿತ್ತು. ರಾಜ್ಯದ ಜನಸಂಖ್ಯೆಯ ಸುಮಾರು ೧೬% ರಷ್ಟು ಜನರು ದಲಿತರಿದ್ದರು.

೪. ೨೦೧೫ ರ ಸಮೀಕ್ಷೆಯಲ್ಲಿ ಈ ಪರಿಸ್ಥಿತಿಯು ಸಂಪೂರ್ಣವಾಗಿ ಬದಲಾಗಿತ್ತು. ಈ ಸಮೀಕ್ಷೆಯಿಂದ ತಿಳಿದುಬಂದ ಅಂಶವೆಂದರೆ, ೧೯೮೪ ರಿಂದ ೨೦೧೫ ರ ಅವಧಿಯಲ್ಲಿ ಕರ್ನಾಟಕದ ಮುಸಲ್ಮಾನರ ಜನಸಂಖ್ಯೆಯು ಸುಮಾರು ದ್ವಿಗುಣಗೊಂಡಿದೆ. ಈ ಸಮೀಕ್ಷೆಯ ಪ್ರಕಾರ, ೨೦೧೫ ರಲ್ಲಿ ಮುಸಲ್ಮಾನರ ಜನಸಂಖ್ಯೆ ೭೬ ಲಕ್ಷ ೯ ಸಾವಿರ ಇತ್ತು. ಇದರರ್ಥ, ಈ ೩೦ ವರ್ಷಗಳಲ್ಲಿ ರಾಜ್ಯದ ಮುಸಲ್ಮಾನರ ಜನಸಂಖ್ಯೆಯು ೯೪% ರಷ್ಟು ಹೆಚ್ಚಾಗಿದೆ.

೫. ಮುಸಲ್ಮಾನರ ಜನಸಂಖ್ಯೆಯು ದ್ವಿಗುಣಗೊಂಡಿರುವುದರಿಂದ, ಅವರು ಈಗ ಇತರ ಹಿಂದುಳಿದ ವರ್ಗಗಳಲ್ಲಿ ಅತಿ ದೊಡ್ಡ ವರ್ಗವಾಗಿದ್ದಾರೆ. ಈ ಸಮೀಕ್ಷೆಯಲ್ಲಿ ಅವರ ಮೀಸಲಾತಿಯನ್ನು ೪% ರಿಂದ ೮% ಕ್ಕೆ ಹೆಚ್ಚಿಸುವ ಶಿಫಾರಸ್ಸನ್ನು ಸಹ ಮಾಡಲಾಗಿದೆ!

ಈ ವರದಿಯನ್ನು ವಿರೋಧಿಸಿದ್ದ ಕಾಂಗ್ರೆಸ್‌!

೨೦೧೫ ರ ಸಮೀಕ್ಷೆಗೆ ಕಾಂಗ್ರೆಸ್‌ನಲ್ಲೇ ವಿರೋಧ ವ್ಯಕ್ತವಾಗಿದೆ. ಕರ್ನಾಟಕದ ಕೈಗಾರಿಕಾ ಸಚಿವ ಎಂ.ಬಿ. ಪಾಟೀಲ್ ಅವರು, “ಸಚಿವ ಸಂಪುಟದಲ್ಲಿ ೭ ಲಿಂಗಾಯತ ಸಚಿವರು ಇದ್ದೇವೆ ಮತ್ತು ನಾವೆಲ್ಲರೂ ಒಗ್ಗಟ್ಟಾಗಿದ್ದೇವೆ” ಎಂದು ಹೇಳಿದ್ದರು. ಇದೀಗ ಒಕ್ಕಲಿಗ ಸಮುದಾಯದ ಅನೇಕ ಮುಖಂಡರು ಮತ್ತು ಸಂತರು ಈ ವರದಿಯನ್ನು ಬಹಿರಂಗವಾಗಿ ವಿರೋಧಿಸುತ್ತಿದ್ದಾರೆ. ತಮ್ಮ ಜನಸಂಖ್ಯೆಯನ್ನು ಕಡಿಮೆ ಅಂದಾಜು ಮಾಡಲಾಗಿದ್ದು, ತಮಗೆ ಅನ್ಯಾಯವಾಗಿದೆ ಎಂದು ಅವರು ವಾದಿಸುತ್ತಿದ್ದಾರೆ. ಏಪ್ರಿಲ್ ೧೭, ೨೦೨೫ ರಂದು ನಡೆದ ಸಚಿವ ಸಂಪುಟ ಸಭೆಯಲ್ಲಿ ಈ ವರದಿಯನ್ನು ಮಂಡಿಸಲಾಗಿದೆ; ಆದರೆ ಈ ಬಗ್ಗೆ ಅಂತಿಮ ನಿರ್ಧಾರ ಇನ್ನೂ ತೆಗೆದುಕೊಳ್ಳಲಾಗಿಲ್ಲ.