ಅಜಮೇರ (ರಾಜಸ್ಥಾನ) : ಶಾಲೆಯಲ್ಲಿ ಹೋಳಿ ಆಡಲು ಹೇರಿದ್ದ ನಿರ್ಬಂಧವನ್ನು ಹಿಂಪಡೆದ ಸೋಫಿಯಾ ಶಾಲೆ

ಅಜಮೇರ (ರಾಜಸ್ಥಾನ) – ನಗರದ ಸೋಫಿಯಾ ಹಿರಿಯ ಮಾಧ್ಯಮಿಕ ಶಾಲೆಯು ವಿದ್ಯಾರ್ಥಿಗಳಿಗೆ ಹೋಳಿ ಆಚರಿಸುವುದನ್ನು ಮತ್ತು ಬಣ್ಣ ಹಚ್ಚುವುದನ್ನು ನಿಷೇಧಿಸುವ ಆದೇಶವನ್ನು ಹೊರಡಿಸಿತ್ತು. ‘ವಿದ್ಯಾರ್ಥಿಗಳಿಗೆ ಸುರಕ್ಷಿತ ವಾತಾವರಣವನ್ನು ಖಚಿತಪಡಿಸಿಕೊಳ್ಳಲು ಈ ಕ್ರಮ ಕೈಗೊಳ್ಳಲಾಗಿದೆ. ಯಾವುದೇ ವಿದ್ಯಾರ್ಥಿ ಬಣ್ಣದೊಂದಿಗೆ ಕಂಡುಬಂದರೆ, ಅವರನ್ನು ಪರೀಕ್ಷೆಗೆ ಕೂರಿಸಬಾರದು’ ಎಂದು ಶಾಲೆಯು ಆದೇಶಿಸಿತ್ತು.

ಈ ಬಗ್ಗೆ ರಾಜ್ಯದ ಭಾಜಪ ಸರಕಾರದ ಶಿಕ್ಷಣ ಸಚಿವ ಮದನ ದಿಲಾವರ್ ಅವರು, ‘ಹೋಳಿ ನಮ್ಮ ಸಾಂಸ್ಕೃತಿಕ ಗುರುತಿನ ಭಾಗವಾಗಿದೆ. ಅದರ ಮೇಲೆ ನಿಷೇಧ ಹೇರುವುದು ತಪ್ಪು. ಶಾಲೆಯ ಈ ನಿರ್ಧಾರದ ವಿರುದ್ಧ ನಾವು ಸಿ.ಬಿ.ಎಸ್.ಇ.ಗೆ (ಸೆಂಟ್ರಲ್ ಬೋರ್ಡ್ ಆಫ್ ಸೆಕೆಂಡರಿ ಎಜುಕೇಶನ್) ದೂರು ನೀಡುತ್ತೇವೆ’ ಎಂದು ಹೇಳಿದ ನಂತರ ಶಾಲೆಯು ತನ್ನ ನಿರ್ಣಯವನ್ನು ಹಿಂಪಡೆಯಿತು.

ಭಾಜಪ ಶಾಸಕ ಸ್ವಾಮಿ ಬಾಲಮುಕುಂದ ಆಚಾರ್ಯ ಅವರು, ಸನಾತನದ ಹಬ್ಬಗಳ ಮೇಲೆ ಈ ರೀತಿ ನಿಷೇಧ ಹೇರುವುದು ಸರಿಯಲ್ಲ. ಶಾಲಾ ಆಡಳಿತ ಮಂಡಳಿಗೆ ಯಾವುದೇ ಅಧಿಕಾರವಿಲ್ಲ. ಹೋಳಿ ಆಡುವುದು ಮಕ್ಕಳ ಹಕ್ಕು ಮತ್ತು ಅವರು ಹೋಳಿ ಆಚರಿಸಬೇಕು ಎಂದಿದ್ದರು.